有觸覺 貼潮流 Kary 型格牛女
於Boxing Day舉行的《恒生勁爆Music World新城勁爆頒獎禮2014》是樂壇首個頒獎禮，出席的每位歌手都悉心打扮亮相，特別是女歌手，出盡法寶，穿着最新、最時尚的服裝赴會，令頒獎禮十足時裝騷！對於是次頒獎禮的服裝評價，時裝作家Janice Wong最欣賞以「西部牛仔」打扮的吳雨霏（Kary），大讚Kary有時尚觸覺跟貼潮流，又帶出視覺效果，襯晒走型格路線的Kary。
吳雨霏（Kary）
「好型，牛仔係今季流行元素，而且2015春夏興返70年代打扮，Kary嘅造型跟貼時裝大氣候。就咁睇以為係牛仔褲，望真啲係一條裙，帶出視覺效果，好有total look整體形象。」
鄧紫棋（G.E.M.）
「唔襯佢，條裙款式唔差，但佢唔夠高、膊頭唔夠薄，着入膊服裝會令手臂顯得好肥。條裙已經係圓領，唔應該戴choker頸鏈，成個造型好累贅。」
謝安琪
「雖然正值冬天，人人都着秋冬裝，但因為12月、1月品牌開始出度假系列，呢條裙圖案好靚，好有春天度假氣息，佢膊頭亦夠靚去穿着。」
鍾嘉欣
「不過不失，黑色晚裝永遠唔會出事，但歌手需要以個人形象去突出自己，佢出席頒獎禮嘅身份係歌手唔係演員，所以呢套衫突出唔到佢嘅存在感。」
衞蘭
「係失敗嘅雌雄同體，雌雄同體造型應該好驚艷，化紅唇妝、着尖頭高跟鞋、貼身西裝褸，而唔係男裝剪裁，依家俊男又唔似，美女又唔係。」
薛凱琪
「都OK，睇得出悉心打扮，造型易令人留下印象。條裙唔會過於隆重，又能夠纖瘦身材，好性感。我好鍾意對耳環，夠晒搶眼又有趣。」
連詩雅
「感覺好似徐小鳳，條裙係好搶眼，但冇個人形象定位。佢年紀輕，條裙太成熟唔襯佢，加上依家流行型格路線同主題性，佢欠缺咗整體形象。」
Profile
王麗儀（Janice Wong），時裝作家，是16年前華語媒體中首位遠赴歐美時裝周報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。