學友：同陳太有分歧
「歌神」張學友在2010年舉行世界巡迴演唱會，創下146場壯舉，今年是學友入行30周年，學友本計劃舉行紀念演唱會，但盛傳學友與合作無間的製作人陳淑芬因「錢」擘面，紀念騷告吹，打亂學友計劃，估計今年損失逾三千萬。學友昨日在電話中親自回應：「首先要幫陳太澄清，喺製作上陳太完全冇畀任何掣肘，呢兩次演唱會幾乎我要乜想乜，佢都盡量去做，至於分（錢）大分細傳聞？從來冇點樣分，大家咁多年講個信字，你畀幾多就幾多，唔存在話我要大份佢唔畀，根本唔關事。」
工作交環球處理
學友表示與陳太多年來合作，沒有合約綑綁，他說：「有啲事上有分歧，我覺得某啲堅持唔一樣，可能大家都係好堅持嘅人。」學友指成件事好簡單，不是傳聞般嚴重到跟陳太劃清界線，他說：「如果將來喺內地搞騷，都會畀陳太老公嘅製作公司做。」
學友由寶麗金年代到環球已經30年，公司一直支持他，他說：「依家做唱片係蝕，都有必要轉型，我都想幫補佢哋，所以演唱會、經理人嘅嘢畀佢哋做，都係時候畀佢哋試吓。」學友表示他的工作會交由環球大中華區總裁暨執行長張松輝處理，他說：「識佢好耐，其實乜冇特別，大家係講信字，唔會簽約。」至今未準備好舉行演唱會，所以他並不急着籌備。
第三者歪曲事實
陳淑芬就不和傳聞回覆：「所謂知情者實在全不知情，毫無根據，歪曲事實，知實情者只有張學友和我本人，我與張學友之間以往的合作關係無需要第三者來作答。張學友過往、現在、將來一直都可自由及按個人意願交給他指定的任何人或單位處理他的工作，我真誠祝福張學友事業更上一層樓，開心幸福。」
文：音樂組