苟芸慧地獄搣脂 斷食7日

苟芸慧（苟姑娘）、馬德鐘、胡定欣及梁烈唯等昨日到觀塘為今晚播映大結局的《飛虎II》造勢，眾演員分成兩隊，穿上特製的吹氣泡泡進行碰碰球比賽，撞到一仆一碌，非常搞笑。

齋飲水唔食

有份落場表現落力的苟姑娘，自爆正進行斷食：「為期七日，期間唔可以食嘢，只可以飲水。（你斷食為拍劇？）公司通知咗我可以返去聽新劇古仔，但我仲未去，我想快啲調理好身體。唔只大家心急，我都心急，之前食西藥，個人好腫，所以盡量用啲接受到嘅方法囉，我完咗斷食至會開劇。（身體有冇唔舒服？）過來人話第二、三日最難捱，又話會情緒上好難受，我今日係第二日斷食，so far冇乜嘢，我精神好好呀！（照去大結局演員飯局？）唔啦，我有嘢做，而且咁多好嘢食，對斷食嘅人係好殘忍！」

一眾藝員穿上吹氣泡泡比賽，梁烈唯擺甫搶鏡。

馬德鐘、胡定欣「兄妹」比賽反目？

馬德鐘則透露將會簽約上海經理人公司，希望發展空間更大，對酬勞好滿意：「幾多錢唔講啦，聽日（5日）會進行盛大簽約儀式，最開心係可以有多啲新嘗試，遲吓去越南拍紀念中越建交電影，得我一個香港演員，聽講羅家英會客串。不過，TVB有啱嘅劇本都可以傾合作。」

兄妹變仇人

定欣期待大結局來臨，她說：「終於等到我出場，我會同鍾嘉欣有好多打鬥戲，打得好粗豪，我都唔係好敢打，怕整親佢。今次亦係我繼《衝上雲霄》後再同馬德鐘對戲，相隔十二年，但佢係我哥哥（《衝》中二人飾兄妹）嘅感覺仍然存在，抽離唔到，今次仲講我哋係仇人，希望下次可以做番兄妹啦！（佢簽約內地經理人公司，叫佢彈啲好路數畀你？）睇吓有冇啱我嘅job彈畀我，有啱嘅劇本，佢都會返TVB拍劇嘅。」

文：影視組