《柏靈頓》（Paddington）以英國家傳戶曉的柏靈頓熊做主角，出生於秘魯，自小憧憬去倫敦的小熊意外被迫離開家鄉，到倫敦尋找新的家人，遇上布朗一家四口，不時好心做錯事鬧出笑料，培養出感情之際，就遇着妮歌潔曼（Nicole Kidman）飾演的奸角向牠追捕做標本，全家出動抗敵。故事簡單Sell溫情，各有笑料對準大人細路，有笑聲又滿載溫馨，加上於聖誕檔期上映，食正節目氣氛，啱晒一家大細。
電影似足英國宣傳片，大橋、地鐵、電話亭與博物館等英國傳統標誌大集合，除開宗明義明Sell英國人「我本善良」，木獨皇家衞兵請飲茶送暖的搞笑場面更見啜核。導演有讚有彈玩埋英式幽默，既講的士濫收車資，國家地理學會將探險家除名一幕更講盡英國人刻薄形象，別於嘻嘻哈哈大堆頭製作的粗疏懶好笑位，加上結尾講溫情又講個人成長，心思抵讚！雖然曾被預告片中毛茸茸又太有真實感的柏靈頓熊嚇窒，不過看畢全片就不覺熊仔與家人互動突兀。另外，妮歌演合家歡電影奸角有驚喜，最爆笑莫過於動作場面大有《職業特工隊》（Mission Impossible）的影子。
文：常歡