蕊蕊抑鬱鬧分手 金剛不離棄

「柑桔」獨闖sing途

入行五年的蕊蕊，由舞蹈員、天使「柑桔」以及現在的跳唱歌手，坦言轉變甚大。而蕊蕊表示在這五年間，每年都有不同的挑戰，令她充滿成功感。

「年年都有唔同嘅突破，講真大家認識我就係美味天使嘅『柑桔』，當時因為我身材比較好，所以大家認識我多啲，自己都覺得幾豐收，之後就靜咗一年，練歌跳舞。2011年再以歌手身份出道，其實起初都幾唔慣，因為之前天使係一大班人，之後我就獨立咁出嚟唱歌，其實係好大壓力，有時覺得表現唔係咁好。所以當時我就收起性感，希望大家記得我係蕊蕊，唔係『柑桔』，等人可以留意我嘅音樂。」

蕊蕊（右）五年前以美味天使「柑桔」的身份出道，令她知名度大增！

金剛在蕊蕊患抑鬱症時陪她渡過難關，令二人的感情更加穩固。

顧家男陪就醫

現時蕊蕊事業得意，愛情亦同樣得意，與金剛拍拖年多的她，兩人十分恩愛。而因工作壓力患上抑鬱症，但金剛仍對她不離不棄，更陪伴她走過每一段路。

身材出眾的蕊蕊坦言性格怕醜，但她遺憾之前影寫真時未夠放膽。	以事業為重的蕊蕊暫時未有結婚的打算。	HunterZ四人各有不同性格和長處，遇到困難時亦能一起面對。

「嗰陣我唔知點解好似有心結解唔開，個人好無耐性，對住佢（金剛）就成日無理取鬧，態度仲差到我自己都覺得好討厭，甚至有幾次我提出分手添，但佢反而無走到，仲安慰我，兼維繫我哋嘅感情。其實我好細個已經有情緒病，但自己無理到，係佢發現我有問題，同我一齊去睇醫生，陪我食藥同覆診，喺身邊支持我，病情好咗好多。依家年紀都唔細，都想搵個結婚對象，不過依家都覺得做嘢緊要啲，所以同佢有共識，暫時都唔會咁快結婚。但有一樣我真係好想讚佢，佢份人真係好顧家，有時佢諗嘢出發點唔係自己，而係佢出發點會係屋企人同我，呢一點講真我自己都做唔到，但佢係可以100%做到！」

寫真女王怕醜

講起蕊蕊，大家都必然想起她34F驕人的身材，去年成為「寫真女王」的她，坦言引以自豪，但她自爆骨子裏十分怕醜，但看到寫真成績理想，表示心郁郁想再影多次。

「我都知大家會好留意我身材，但其實我真係好怕醜，低胸少少我無問題。舊年我出咗本寫真，其實用咗好多時間去warm up，自己都用好多時間去調整心理，自己睇番其實都可以再放膽啲，不過見到出嚟效果咁靚，我心郁郁想出多本。但可惜我覺得自己個mood唔夠性感，希望可以再練多啲。」

組隊同伴分憂

蕊蕊除睇得之外，本身是舞蹈員的她，去年終於願望成真，與陶枳樽（Crz）、何麗娟（Kelly）、鄧詠雪（Suetzi）組成組合HunterZ。

「真係好好彩，畀我搵到Crz、Kelly同Suetzi同我組一隊組合，以前其實都已經好想組隊組合，但一直都搵唔到合適嘅人選，最後都畀我搵到！雖然我哋四個人各有所長，性格亦唔一樣，但唔知點解出到嚟真係好夾。以前單飛咩都要自己去處理，壓力又係自己一個承受。但依家有四個人，開心同唔開心都有人喺自己身邊，感覺好溫馨，大家好似一家人咁！我都好多謝我經理人一直都畀我好大嘅空間，我想我做咩佢都畀我去做，好支持我。」

文：林倩怡

攝：劉斌

場地：Freepho