陳豪拖大肚茵媺推門做阿四
陳豪與懷有第二胎的太太陳茵媺（Aimee），元旦日撇甩寶貝仔，恩愛地拍拖睇戲，向來視老婆為「My Queen」的陳豪每行一步都拖實腹大便便的Aimee，連推門也不讓她操勞，第一時間搶住代勞做阿四，完全將老婆照顧得妥妥當當。
陳豪與Aimee的大仔剛滿一歲，兩人已火速再度造人成功，懷孕7個多月的Aimee早前宣布再佗男B，兩公婆都直言恨女，希望繼續追下去。被陳豪指佗得比上次舒服的Aimee，前日靜極思動，撇甩寶貝囝囝相約老公趁元旦日出街拍拖。
甜蜜睇戲
當日Aimee穿上平底鞋及厚褸，腹部明顯隆起，陳豪深明大肚婆易攰，細心地安排行商場及睇戲作為假日節目，兩公婆在商場慢行一陣便入場睇戲，至傍晚6時散場後始見他們拖到實步出。難得出街享受二人世界，Aimee心情相當開朗，只見她邊行邊摸肚，一臉雀躍地和老公有傾有講，似仍在討論剛才的劇情，期間不少途人認出兩人，紛紛投以好奇目光，但兩公婆一於少理，繼續有傾有講。
及至發現記者鏡頭，陳豪和Aimee不約而同流露一致的燦爛笑容，然後繼續拖實步往酒店方向，行到玻璃門前，正當Aimee要出手推門時，陳豪生怕老婆操勞，第一時間搶住代勞，果然將老婆視為「My Queen」！
文、攝：追蹤組