張智霖身家暴漲2億

藝人張智霖、莊思敏、雨僑、石詠莉、鄭欣宜、王宗堯、Super Girls和張建聲，昨晚出席「中國3D數碼娛樂有限公司3周年晚宴暨張智霖續約儀式」活動，簽約儀式上，蕭定一向張智霖送上鍍金的「張智霖肖像」和寫着「The Great Chilam」字樣的牌匾，蕭定一說：「祝你由藝人變成大亨。」而蕭定一和張智霖分別拿出廿萬和十萬元給晚宴抽獎之用。

蕭定一搞分拆上市

張智霖在公司主席蕭定一率領下，各方面事業發展一直一帆風順，事業再創高峰，促成他今次再與蕭定一合作加簽三年合約原因之一。據知，今次蕭定一除了出盡誠意打動張智霖加簽外，還出動銀彈政策「利誘」，蕭定一除了以一億簽三年的酬勞游說張智霖外，其實蕭定一計劃分拆一間全新成立的經理人公司，估計兩、三年後便會成事正式上巿，屆時蕭定一將會分拆新公司的一半股份給張智霖，並安排他出任CEO職銜，到時張智霖便與謝霆鋒睇齊榮升年輕才俊CEO行列，而新經理人公司則主力藝人管理和演唱會事宜，極具發展潛力。保守估計屆時張智霖所持有的股份價值約一億元，變相張智霖三年便進帳兩億元，條件相當可觀。

左起：雨僑、石詠莉、王宗堯、周秀娜、張智霖、莊思敏及蕭定一（右一）齊齊祝酒。	蔡一智（左） 嘩！你發達啦，老友鬼鬼請旅行啦！（設計對白）	Super Girls扮靚靚撐場。

睇齊謝霆鋒唔敢當

記者致電張智霖求證，他表示雖然初期與公司合作有點「沙石」，但與蕭定一合作保持愉快，他說：「唔係我對佢有信心，係佢對我有信心啫，大家工作方向和路向一致。（進帳兩億？）錢真係唔講嘞，但老套啲講，都係講心唔講金，最重要大家做到嘢出來。（做CEO？）咁快？我真係矇查查。其實係有提過合作一間公司，但冇咁快講。（同謝霆鋒睇齊？）邊敢當。自己係有興趣簽啲有潛質藝人，但我唔會主攻幕後，我自己幕前工作都兼顧不下，開拓巿場好重要。」他又謙虛表示不懂做生意，需要向蕭定一多多學習，而2015年主力電影工作和還廣告債。

蕭定一祝張智霖由藝人變成大亨。

張智霖為「The Great Chilam」牌匾揭幕。

在活動上張智霖則透露當初與蕭定一簽下三年合約，履行了一年，現再續三年。問到是否八位數字酬勞，他說：「唔講，今日去完見會計，今年交好多稅，唔想講呢啲。（入股公司？）有計劃過公司上的合作，都係嗰啲咁嘅嘢囉，唔覺得我今日好似大亨咩？」

partner方式送巨額股份

蕭定一則坦承與張智霖會有公司上的合作，除了賓主外或者會是partner方式，問到是否會入股？他說：「有計劃過但未實行。（送股份？）呢個世界冇免費午餐嘅，佢值得有呢個收入。我哋合作好開心，我見過唔少藝人，佢係一個太藝人的藝人，溝通到兼明白事理，賺錢能力好高。（八位數續約？）七位？八位？好似唔止喎，如果以每年計佢都益咗我o架，依家續約多三年，合約到2019年，（億計？）合理，做人唔好太巿儈。」

文：影視組