文詠珊黃金5年 愈難愈勇
人生有幾多個五年？2014年文詠珊（JM）就踏入人生的轉捩點，由入行做了五年模特兒，到升呢做五年「模Art」，十年過後，現在她成立自家工作室兼簽新公司，同時進軍內地拍劇，明天26歲生日的JM實現願望，展開第三個的五年計劃。
文詠珊（Janice Man，JM）不經不覺入行十年，由14歲被星探發掘，到與Angelababy孖公仔拍廣告吸金，到成為「黎明愛將」，五年又五年，2014年JM簽了新公司太陽娛樂文化兼建立自家工作室，明天（29日）26歲生日的JM已經成為老闆，更進軍內地搵人仔，電視劇、電影一套接一套，正式開始她第三個黃金五年。
有代表作勝攞獎
JM最近忙於在上海拍劇《畢業歌》，要在當地逗留三個月，到明年一月才拍完，雖然要用普通話演出，對她來說是一個新挑戰，同時間亦兌現她多年的願望：「踏入第三個五年，簽新公司，有自己工作室，一直想去唔同地方做戲，希望角色做得愈高愈難，咁先會成長，依家做嘅嘢都係計劃之中，要挑戰愈難角色就有一定壓力，愈接近目標壓力就愈大，我希望自己同時進步同有成績。」喜歡拍戲的JM希望擁有自己的代表作，覺得作品劇本比獎更重要，她說：「攞獎係開心事，係一個鼓勵，我覺得獎項又唔係真係最重要，作品先係最重要，作品有觀眾睇，睇到我努力，從作品中認識到我，係一個獎勵，所以我一定要努力。」JM的努力確實是有目共睹，可說愈戰愈勇。
上海拍劇惹鄉愁
2015年大半年JM都將會留在內地搵人仔，劇接劇，年尾就會回港接幾套電影，但其實她好想念家人，亦會爭取時間陪家人：「會想念屋企，自fashion week之後，就不斷飛，好耐冇返屋企，可能返一日屋企之後又再飛，一返香港就好開心，可以見番熟悉嘅人，好親切，平時工作都唔會有homesick，但今次去上海就真係有，因為留幾個月，返得香港一兩日，但又要工作，可能只可以同屋企人食餐飯，大家都會特別珍惜時間。」JM其實一向都好獨立，更會自己煲湯養生，故到上海拍劇反而要求公司不要叫同事上來照顧，因為她想融入劇組，感受不同地方工作的文化。
存正能量境即順
事業得意，感情上仍然交白卷的JM身邊不乏追求者，雖說正值芳華，但她選擇專注工作：「感情隨緣，冇畀壓力自己，冇話一定會點，如果有一個好錫我嘅人出現，就固然開心，冇一個女仔唔想有人錫，我抱住要出現就出現嘅心態，自己又咁忙，放多時間喺工作，一個人有正能量，所有好嘅嘢就會嚟，呢個係好自然，一順就會樣樣開心。」
不少女性怕30歲嫁唔出，急於30歲結婚，而JM坦言不會放棄自己的事業：「我唔會捨棄我嘅工作，我一直付出努力、時間，唔會因為咁而放棄事業，就算會發生（結婚），我都唔會放棄，因為我唔可以唔做嘢，就算未必係做依家嘅嘢，我都會去做其他嘢。」JM笑言想有預知能力知道Mr. Right何時出現：「Mr. Right唔知幾時會出現，呢個係好玩嘅地方，人生入面有好多不同嘅嘢去估，要學識享受等待嘅過程，要自己識得分配時間。」JM事業心重，不會刻意追求愛情，只會順其自然等待真正的Mr. Right出現。
Fit爆代言人
JM習慣每日都做運動，難怪擁有22吋纖腰，她說：「食咗嘢就23、24吋，要『的』起心肝去做gym，喺香港就boxing同yoga，唔喺香港拍戲就搵運動做，好似跑吓街咁，做運動要時刻保持住先會有美好身形。」Keep得咁fit，難怪JM成為adidas 2014冬季羽絨系列代言人。JM平時怕凍，加上到上海拍劇就更寒冷，故她着重羽絨要保暖及輕身，同時亦要每天飲熱湯：「我好怕凍，冇熱嘢食，我嗰日會唔舒服，每日要飲湯。」
採訪：李詠林
攝影：張福宏
服裝：adidas