蕭正楠 曹永廉愈窒愈交心
蕭正楠與曹永廉因拍攝劇集《大太監》老友鬼鬼，公私無所不談，更「無所不窒」！蕭曹經常舌劍唇槍互寸，但感情卻「愈窒愈好」，蕭正楠說：「呢啲真朋友喺呢行好難得！」曹永廉回應：「大家係交個心出嚟做朋友！」
互度對白食NG收場
蕭 = 蕭正楠 曹 = 曹永廉
曹：其實你好自私，拍《名門暗戰》嗰陣成日自己爆肚，哈哈，劇本已經好好，我就好少爆肚，只係將啲對白變得生活化。
蕭：我成日都諗點樣可以將啲對白變得絕啲，係呀，唔講o架，一嚟就嚟，送畀你嘅，哈哈。
曹：有幾場戲見你喺度靜靜雞諗，等我都諗番啲嘢嚟窒番你先，結果拍嗰陣自己忍唔住笑NG。
蕭：你都陰濕啦，試嗰陣唔講，到正式拍先嚟陰我。最好笑係窒完你，你話等我今晚返去諗諗先，聽日先覆你。
曹：我費事駁嚟駁去啫。
蕭：為民除害啫，有啲同事唔出聲就畀你恰，哈哈。我、黃浩然、陳國邦，依家連黎耀祥都睇唔過眼，個個圍攻你，惹人討厭冇得解嘅，哈哈。
曹：其實我窒人好犀利，所以蕭正楠、黃浩然覺得窒到我好威風，點解我唔駁嘴呢？窒人係要有交流，你窒吓我、我窒吓你咁先好玩。
蕭：係呀，大家感情咪愈窒愈好，私底下先可以咁friend。
自認招積又口臭
曹：你個樣又係招積嘅，嗰陣同你唔熟，睇《天梯》覺得你又做得幾好，聽聞你把口仲幾臭添，不過我就係欣賞呢種人。
蕭：我係咁嘅，我唔熟係會唔點講嘢，我靜起上嚟都幾得人驚o架。
曹：依家笑多咗係親民啲，可能依家開心啦，哈哈。
蕭：你除咗係好多年前嘅歌手、仲拍咗好多劇，係老前輩，但係又好奀皮、唔輸得，係一個好好嘅喜劇對手。我哋五兄弟去橫店拍《大太監》個幾月關係進展得好快，喺香港大家就掛住背劇本，上到去係多時間嘅，下晝大家可以吹足一日水，由事業、發展、起跌全部都攞晒出嚟講，五條友就係咁變咗真心朋友，搵到呢班朋友都幾難得。
「真朋友喺呢行好難得」
曹：《大太監》係令我哋五個變得熟落，最緊要大家冇機心先可以走埋一齊，乜都可以講。好似拍《名門暗戰》，見到有啲咩做得唔好，大家會直接講出嚟，其實呢啲說話唔係咁多藝人可以做到，有啲聽到會覺得唔舒服，我哋幾個就會互相去問做得好唔好？做錯咗大家會提點，所以埋位好快手，好少NG，NG都係因為忍唔住笑。
蕭：呢啲真朋友喺呢行好難得，有時驚講多咗，講出嚟會唔會好多事呢？講真你係好有朋友心，亦都係好善良嘅人，所以身邊好多朋友，個個當你係心腹，呢啲優點係令我可以同你做buddy、死黨，我都好少同咁大年紀嘅人做老友，我啲朋友都同我差唔多年紀，哈哈。
互知底線玩得盡
曹：最緊要係唔好有害人嘅心，有時講嘢我會好小心，始終大家年紀大咗，玩得過分又唔得，要知道佢底線喺邊，咁你都幾玩得嘅。咁大家交個心出嚟，有咩唔開心呻吓，大家把口又夠密呢。
蕭：我又冇你咁小器，哈哈。
曹：我哋幾個性格都唔同，有啲條底線高啲、有低啲，自己去感受喇，基本上大家互窒吓真係幾開心，大家拍咗咁耐劇都知道，要拍完一套劇之後成班人一路有聯絡、食飯，係少之又少，一月我哋五個再拍《公公出宮》，到時又有排癲喇。
蕭：你冇得癲啦，今次有外父（姜大偉）喺度，嗰日節目巡禮成隻小綿羊咁，哈哈。
後記
同行如敵國，從中發展友情變得難能可貴，蕭曹的確十分老友，雖然一有機會就會自動鬥嘴，但友情極深，產生不少默契。拍攝尾聲，兩人應要求擺出有趣甫士，蕭曹商量幾句，即齊齊「拳來腳往」擺甫士，合拍度一百分！
採訪：影視組
攝影：張福宏
服裝：WRUNG（曹永廉）
服裝：Dorian Ho（蕭正楠）
髮型：Kenneth
化妝：志仔