李智恩韓式SEXY
雖然現時正值冬天，但韓風繼續熱吹，早前一班當紅韓星赴港出席在港舉行的韓國樂壇年度盛事MAMA頒獎禮，一眾女星在紅地氈的衣着打扮成為焦點！名模陳嘉容就大讚韓國女星李智恩充滿光彩，穿出明星風範，崔智友亦星味十足，令人眼前一亮！
李智恩（IU）
「好有光彩同明星風範，呢個Look好適合行紅地氈，好搶眼，高貴得嚟又性感，係高格調嘅性感，前短後長嘅裙款依然好Hit，又可以騷到佢對美腿。」
崔智友
「好飄逸，令人眼前一亮，星味十足，非常適合佢高貴優雅嘅形象，演繹咗咩係簡單就是美，就算佢本身唔係好高都着得佢身形夠晒高挑修長。」
Yura
「普通咗啲，冇咩星味，完全唔突出，條裙嘅Cutting着到佢冇乜線條，如果裙襬長啲有拖尾會靚啲，同埋可以加番啲誇張啲嘅Accessories令造型突出啲。」
尹恩惠
「兩個字：好悶。條裙款好過時，冇乜時尚感，Cutting好普通，唔啱行紅地氈，由頭到腳成個感覺都好普通，無花心思配搭過。換對金色嘅Ankle boots或者銀色高踭鞋會突出啲，搽番個紅唇會亮麗番啲。」
少女時代 Tiffany
「條裙OK，可以騷到佢雙長腿，充滿青春氣息又帶啲性感，髮型化妝都襯，襯埋對裸色高踭鞋，成個Total look感覺舒服又有少女味。」
孝琳@Sistar
「條裙本身靚，不過佢着到肉感得滯，感覺好似露太多肉，戴番條頸鏈或者Choker，又或者係換對誇張款式嘅耳環，放番啲頭髮落嚟，個效果會冇咁肉感，亦會多番啲層次感，身形比例會好啲，成個Total look感覺會舒服啲。」
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝的理論還是實戰都難不倒她，近年更為電視時裝節目擔任主持，化身stylist教人配襯衣着打扮。