戴凱欣分享美食 大公無私
四洲集團太子女戴凱欣可謂時代女性典範，入得廚房出得廳堂，煮得一手好菜，揚言入廚是她唯一興趣，因而成為動力，就算平時忙於打理家族生意，假日都會為家人親自下廚。她曾宴請不少朋友品嘗，好評如潮，但她表明不會做「私房菜」，因為將興趣變得商業化會失去意義。
城中不少靚女富二代，除了身家豐厚，工作能力強，個人興趣發展亦非常了得，可謂樣樣皆精。家族擁有巿值16億王國的四洲集團太子女戴凱欣（Kennis）就是其中一分子。她自澳洲大學畢業後就回港打理家族生意，現任四洲集團企業發展部董事，主要管理公司旗下代理的日本零食、日本餐廳、素食餐廳等等，業務繁多。
無師自通有天分
Kennis每日花十多小時在工作上，平時唯一興趣及娛樂就是「煮飯仔」，而引發這個興趣的是她的弟弟，她說：「我同細佬喺澳洲時，要煮嘢畀佢食，當日唔識煮，但無論幾難食，佢都一定會食晒，所以惟有畀心機啲學煮，後來返咗香港，每星期日都係家庭日，就會自己煮畀家人食。」Kennis對下廚甚有天分，無師自通，全部自己鑽研，她說：「我出街食飯食到好味，就會返屋企試煮，慢慢愈整愈多款式。」品嘗Kennis菜式的朋友，無不讚她廚藝一流，被問到有否想過開私房菜，她說：「冇，整畀朋友食同用嚟做生意完全兩回事，如果開私房菜就要計好多嘢，又要成本，又要諗係咪賺錢，咁會將我呢個唯一嘅興趣變咗質。」被問到緋聞男友黃宗澤可曾試過她的廚藝，她說：「冇，我同佢只係朋友，依家好少見。（快啲搵番個男友試菜？）我都想，但感情嘅嘢冇得強求，我會努力。」
一人煮十多款菜
日前Kennis藉着吃大閘蟹的季節，親自下廚邀請好友何國鉦（Dorian）、王嘉恩夫婦及幾位好友品嘗大閘蟹及上海菜，當中包括獅子頭大白菜、蟹粉粉皮、胡椒蝦、金銀蛋豆苗、鴨舌與熏蛋等等，Kennis認真對待，事前已計劃了菜式並詢問好友意見，一個人煮了十多款菜。相識十多年的Dorian試過她不少菜式，每次都拍爛手掌，他說：「佢煮嘢真係無得頂，初初佢叫我嚟食飯時，我完全冇諗過佢識煮餸，因為佢平時都好男仔頭，而且又係千金小姐，似被人服侍嗰種人，但估唔到每次都有驚喜。」
文：名人組