家燕姐撥行翻撻嘉穎 阿佘：我都OK o架！
佘詩曼與鄭嘉穎這對舊情人，隨住戲中「阿媽」薛家燕踢爆兩人眼神過電後，復合之說甚囂塵上，昨晚家燕繼續撥行大葵扇，揚言會力邀嘉穎上電台節目訴心聲，又呼籲傳媒到澳門探班，暗示嘉穎會到來探班，慘被擺上枱的阿佘則無力招架，自言病到迷糊，結果被「阿媽」過一戙！
無綫《萬千星輝頒獎典禮2014》昨晚於電視城舉行慶功宴，一眾台前幕後及得獎者出席，如出爐視帝郭晉安、視后佘詩曼、黃翠如、高海寧、薛家燕、吳啟華等，場面熱鬧，席間亦公布頒獎禮當晚收視平均31點，最高達34點，成績相當不俗。
力邀上電台剖白
雙料視后阿佘感情方面向來備受關注，近日她與薛家燕於《十月初五的月光》電影版再續「母女緣」，家燕姐日前更踢爆阿佘有戀事，並暗示此人是舊愛鄭嘉穎，昨晚家燕姐起初封口避談，未幾卻忍不住口謂：「我同嘉穎都熟，想請佢上電台做嘉賓，畀45分鐘佢，問佢心入面係咪仲有阿佘。」家燕姐愈講愈興奮，再撥行大葵扇謂：「其實之前睇電視見佢兩個眼神過電，但同Chilam感覺就似一家人，冇呢種感覺囉！」
慘被擺上枱的阿佘抱恙上陣，對於家燕姐一番言論，她無奈謂：「佢太敏感，梗係唔係，畀阿媽過一戙，要多謝阿媽！」此時，家燕姐再走到阿佘身旁繼續發表：「其實嘉穎都唔錯。」阿佘聞言回應：「我都OK o架，都係好女仔。」家燕亦即家長上身，指嘉穎愛把事情埋藏心底，故可能不敢向阿佘說，更呼籲傳媒多點到澳門探班，暗示會有意想不到的收穫，阿佘卻無好氣地謂：「等佢做完訪問再講。（嘉穎喺無錫活動度話同你冇機會復合？）點解會咁，我唔知，病到好迷糊，冇追新聞。」
李寶安否認升職
將在明年1月1日由集團總經理變為集團行政總裁的李寶安，昨晚否認升職之說，表示工作範疇一直沒有改變，又坦承無綫未來方向一如梁乃鵬之前所說的向內地發展：「內地市場大好多，公司方針唔會變，梁主席服務咗無綫11年，公司好感謝佢，佢在任期間公司有唔錯嘅成績。」無綫高層樂易玲翹余詠珊現身，一拐一拐而行的她原來因腰患做了微創手術之故。
文：影視組