馬詩慧另類浪漫
緣分將兩個人拉在一起，而愛情就令一個人改變。名模馬詩慧（Janet）與老公王敏德（Michael）結婚逾廿載，由以前默不作聲，到現在據理力爭，二人人前恩愛，人後Janet就經常挑剔老公，更愛「雞蛋裏挑骨頭」的另類情趣，愛情的牽引就如Janet所言：「緣分到要擋都擋唔住，要走拉都拉唔切！」
名模馬詩慧（Janet）與王敏德結婚22年，育有二女一子，分別是大女曼喜、二女麗嘉，以及孻仔躍穎，一向予人剛強、直腸直肚的Janet與老公Michael相處時同樣凸顯自己真個性，與老公猶如朋友一樣。有人說愛情要保鮮，Janet一針見血表示：「如果as fresh as beginning係呃你，依家係以朋友關係相處，就好似小朋友一樣，要去相處，夫妻都係一樣，我覺得愛情係隨時間增長，而唔會好似以前有咁多火花，慢慢淡啲。」
老公愛送花寫蜜偈
有人說懂得下廚的男人特別浪漫，相反女人天職要入得廚房，出得廳堂，外表剛強的Janet，就將浪漫情調交由老公去處理，她笑言：「我唔係浪漫嘅人，有時Michael就會搞吓浪漫，突然send sms，寫下甜言，買花送畀我，我就成日都話唔好買花，折現畀我，所以佢呢方面會做多啲。」愛從來都不能夠單方面，要由雙方共同去付出，雖說Janet不懂得浪漫，但她對家人的生活瞭如指掌，特別對老公體貼及執着，她說：「佢知我係乜人，我唔識特登去做啲嘢去please佢。我會做其他嘢，好似佢每朝早都要食生果，我就確保佢有得食，我會覺得咁樣係另類浪漫。」Janet選擇經營愛情，而非驚喜愛情。
為子女改寡言性格
「夫妻床頭打交床尾和」，要同Janet嘈交，點估都知必然是Janet贏？她笑言：「睇鬧乜，有reason個贏，即係我囉！以前我嬲會唔出聲，依家會講到大家明白，咁就得，佢都唔會放喺心，講好咗就係。」她指以前性格不愛談話，剛入行做模特兒時被指是啞巴，但仍然我行我素，但一切就由有小朋友後改變：「有小朋友後就會講多咗嘢，一定要溝通，唔出聲人哋唔知你想點同諗乜，大人都仲可以估吓，但小朋友唔講就真係唔知想點，所以有呢個改變。」提起Janet有小朋友後她的改變，她大數自己的缺點：「我個人直，就係由小到大，倔強不嬲都係，不過改咗少少，我會同小朋友講唔好學我咁固執，要靈活，社會唔同，唔可以咁死板，唔係得呢條路就行呢條路，張枱四方形，而唔係圓形，要識轉彎。」為了一個家庭Janet都不知不覺改變了自己。
緣分冥冥中有主宰
典型處女座凡事都講求完美，然而對Janet來說人和事都沒有完美，永遠有進步空間：「冇人係完美，老公都係，點都會有缺點，好似我都會有執着、倔強、挑剔，好似Michael有次做完push-up100下，我就會話100咁少，我仲去雞蛋挑骨頭，佢就話我，但其實我應該係抱欣賞態度，呢個可能係我哋之間嘅情趣。」有人喜歡新鮮感而去投入另一段感情，亦有人害怕另一半會有「小三」，但Janet卻非常淡定，她表示：「唔驚，驚就做唔到夫妻，驚就唔可以一家人相處，要日日驚，我唔會想咁樣過，一對夫妻關係基於大家的信任。」
愛情沒有可不可惜，而是有沒有緣分，名模Amanda S.與相處10多年的另一半分開，Janet說：「緣分好難講，緣分到要擋都擋唔住，要走拉都拉唔切，霆鋒同王菲係好例子，真係要一齊，就算最後都辛苦，就算一東一西，最終都會一齊。我好相信緣分，緣分將我同Michael拉埋一齊。」Janet深信緣分是冥冥之中自有主宰。
支持曼喜
子女都開始長大，亦會經歷拍拖的階段，Janet亦有教導子女緣分不能強求：「問人擇偶條件，答咗你個條件，搵到個match唔到嘅人，但就算大家都好啱傾，唔通都唔一齊？就算高大靚仔，人哋都未必肯理你。」而大女王曼喜出櫃她亦都支持：「佢同我一樣係好執着嘅人，喺呢個世代，唔係我哋想點就點，想佢哋開心、健康，戥佢哋開心。」
採訪：李詠林
攝影：劉斌
場地：富豪香港酒店