周柏豪人棄我取獎照爭
就到年尾樂壇頒獎禮，不過一班天王天后級歌手紛紛放風表示賺錢為上，未必現身，可以想像頒獎禮冷清場面，故周柏豪昨日就以後輩兼fans身份力勸陳奕迅畀面出席，同時恨攞獎的他又支持要有頒獎禮：「我仲活躍o架！」
周柏豪、泳兒、林欣彤（Mag）、羅力威、許靖韻等歌手昨日一同出席「恒生勁爆Music World新城勁爆頒獎禮2014」拉票行動第一回，今年一眾一線歌手齊齊放風表示未必出席頒獎禮，柏豪就開口挽留陳奕迅（Eason）說：「我好想佢出席，佢係偶像又係前輩，有佢喺度後輩會做得好啲。我係歌迷，好想聽到佢唱歌。」
但Eason缺席的話，他豈非更大勝算奪獎？他說：「唔好咁講，仲有好多人。」對於有傳他男歌手獎呼聲甚高，他就說：「唔一定嘅，傳聞啫，聽完會搵套靚啲嘅衫。」並表示不贊成取消頒獎禮：「對於我呢啲活躍歌手，做咗啲嘢都希望喺頒獎禮度有證明。」他在上屆頒獎禮曾發表愛的宣言，他笑言今年未必會有：「冇ready過，都唔知個成績係點。如果拎住個我覺得好犀利嘅獎，會講唔到嘢，我個人好騰雞。」
台下孤零零
Mag則表示雖然容祖兒未必去頒獎禮，但仍沒想過奪歌手獎，反而恨攞歌曲獎：「《食物鏈》拎咗三台冠軍，所以都幾有信心。（無綫頒獎禮信心最大？）差唔多啦，有同冇下年都會努力。」
緋聞情侶羅力威和雨僑雖然同場，但全程零交流。當羅力威表演完下台時，叫他和雨僑合照也充耳不聞，獨留雨僑在台下形單影隻。而聲沙沙的泳兒表示在廣州工作時冷親失聲，被家人笑指她似喪屍，更被同事禁止她表演：「本身我今日想唱歌，但同事話我把聲會嚇死人！」
文：音樂組