余文樂轉玩古董波子
近年賺到盆滿缽滿的余文樂，家中「車庫」陣容亦愈來愈豪，架架戰車價值不菲，玩得新車多，樂仔更培養出另類品味，日前親自去試1990年出廠的古董跑車，唔同車款有唔同感覺，兜完一轉後，樂仔興奮到如同發現新大陸，手舞足蹈地和同行的沈嘉偉分享，繼而再往下一個車行睇車，似乎心急買新「玩具」！
余文樂近年與愛車之人郭富城、張智霖及邱淑貞丈夫沈嘉偉埋堆後，不時聚埋研究新車，各人輪流換靚車，經常食消夜都揸過千萬靚車「晒冷」，當中余文樂自成為影壇搶手貨後，電影一部接一部，資產進帳不少的他，戰車亦愈換愈豪，無論150萬寶馬5系、110萬平治C63、抑或300多萬及800萬林寶堅尼，都絕不手軟，今年7月始斥資250萬購下平治G63的他，最近又心思思搵新嘢玩。
兜風15分鐘心情靚
早已擁有不少超級跑車的樂仔，今次並非想換新車，反而玩車多年經驗令他想找另類獨特的車款。日前下午3時，樂仔駕駛平治新車停開寓所，直往柴灣工業邨一條內街，泊好車後，已有一名外籍人士步出迎接，只見樂仔笑容滿面地步入一間陳列室，逗留一會兒便駕駛一輛古董保時捷跑車出現，於工作人員陪同下開始試車，約15分鐘後，樂仔在附近兜風回來，此時老友沈嘉偉抵達車行等他。
沈嘉偉陪吔魚蛋粉
樂仔和沈嘉偉與職員傾了一陣，兩人分別駕車離開，會合沈嘉偉胞弟沈健偉，到附近的東大街食平民魚蛋粉，由於全店滿座，兩位「有頭有面」的名人都冇面畀，要站在門口等位，只見樂仔懶理街上人來人往，七情上面地向沈嘉偉分享剛剛試車感覺，指手畫腳，如同遇上新玩具的大細路。兩人傾到相當雀躍，匆匆醫肚後又驅車向新界進發，直駛沙田的另一間陳列室，似乎樂仔相當想購入新「玩具」，為家中「車庫」再添一名新成員！
麥浚翹是車主之一
根據查冊顯示，樂仔當日所試的古董車以公司名義登記，該公司其中一名董事為歌手麥浚龍（Juno）哥哥麥浚翹，該車1990年出廠，雖然古董車維修不易，但因為有獨特個性始終有一班擁護者，而古董車售價亦因為保養而各有不同，今年9月有同年份保時捷以約20萬售出。樂仔今次睇中古董車，貪其每輛有自己個性和歷史，加上能碰到合心意的已停產款式，可謂「可遇不可求」！
文、攝：追蹤組