天堂鳥笑住做「花生」任食唔嬲
身為「MK POP」之一的男團天堂鳥，出道未夠一年就舉行音樂會，難免會擔心發台瘟，樂觀的三子就當是學習機會，Gordon更想進軍影壇演殺手，大過戲癮。提到初出道因出眾的化妝演變成潮語「豁！豁出去！」的歌詞，成為大眾「食花生」的對象，他們都一笑置之。
對於剛出道的批評和取笑，三人都笑住面對，Gordon自認樂觀：「有人笑我哋，我哋會自己討論有咩做得唔夠好，又互相笑吓就冇事！同埋我哋相信只要做得好，好快會有人認同！」三子估計Lincoln會吸引較多男fans，最後竟是Gordon爆冷勝出。而三子平時喜歡一齊運動，又強身健體keep住好身形，又可以維繫感情。
勁發台瘟
出道短短數個月就開音樂會，三子雖有壓力，但珍惜機會，Tyrese坦言：「出道未夠一年就開兩場音樂會係有壓力，但對我哋都係一個肯定，想表現到最好同唔同嘅一面畀大家睇！」Lincoln亦大呻又唱又跳好困難，兼常發台瘟：「我哋喺台上經驗又唔多，會怯！排舞時練好晒，上到台都跳錯，呢方面就熟能生巧，每一次都係學習機會！」
三子主意多多，Gordon話有興趣拍戲拍劇，想做殺手：「我哋都試過好多唔同casting，希望來年會有更多唔同工作，好想有人搵我哋三個一齊拍戲。」Lincoln話自己任何角色都想試：「但係最想試做奸角，挑戰性比較大，又畀人睇到我另一面。」Tyrese就任何人都想合作：「因為自己各方面都係新人，個個都係學習對象！」
文：專案組
攝：嚴偉國
場地：Twinkle Baker Decor