岑日珈事業為重 唔恨拍拖
樂壇女新人岑日珈（Angie）短短出道半年已目標明確，想磨練自己「周身刀把把利」，歌、影、視三棲發展。身為後生女事業心極重，坦言絕不憧憬愛情！
即將出道半年的岑日珈（Angie）年僅20歲，雖然年紀輕輕，但是她的目標明確，立志踏上星途！面對中學畢業的人生交叉點，Angie幸得家人支持，入行做跳唱型歌手：「讀完中六就諗吓自己條路想點行，就嚟畢業嘅時候就決定入呢一行。其實之前冇跳開舞，開頭都唔知得唔得。好彩排舞老師覺得我表現OK。」Angie更坦言勿忘初衷，會好好記住台上的每一刻：「台上嘅兩三分鐘表演，畀我見到台下嘅人嘅眼神，我覺得好感動，令我好想努力做落去。」
逐步發展
雄心壯志的Angie更相當「花心」，想歌、影、視瓣瓣掂，不過心知不能一步登天，決定逐步發展：「出完碟，忙完今年嘅事，年尾有時間就想去涉獵唔同嘅事，去學做戲，向住做演員嘅目標進發。（演出底線？）自問身材唔好，露腰或者性感少少都可以嘅，相信公司要我做嘅都係啱我。」
照顧自己
身為青春少艾的Angie既「花心」又「狠心」，總之事業為重，向拍拖Say No：「唔想拍拖，啱啱先事業起步，一拍拖就會分咗心，加上自己仲細，有就有冇就冇，緣分天注定啦。」有孝心的Angie亦相當「識諗」，只想父母放心：「爹哋媽咪由細到大都好照顧我，事事緊張，我想畀佢哋知我大個女，可以照顧番自己。」
文：專案組