高鈞賢勇闖內地 捱出頭
高鈞賢於大陸簽了新經理人公司，向外發展，數個月已搵了過百萬酬勞，更初嘗做男主角滋味。他表示於大陸拍戲時，都遇到不少舊同事，之前就香港先生遇上香港小姐，與拍《張保仔》的陳凱琳相遇，坦言開心。
高鈞賢之前離開無綫向外闖，現時於橫店拍攝內地劇《山海經之赤影傳說》的他，坦言初初於內地工作、生活都不習慣，尤其是食方面，但內地都有很多香港演員同導演，提點他不少，現時「知定」就好好多。短短幾個月，他已穩袋百萬酬勞落袋，簽了新經理人公司的他，拍完此劇之後，亦會拍一部網劇及時裝劇，初嘗男主角滋味，之後亦會拍攝內地真人騷節目，工作多籮籮。
消防片全國播
日前，他更被挑選拍攝內地消防員的宣傳片，於全國播放，他謂：「可能之前自己都拍過《烈火雄心3》佢哋睇過，佢哋又需要一個年青人，所以好幸運自己拍到，而且自己都拍緊劇，都好難請假，劇組好好，畀我請咗幾日假拍呢條片。」他又坦言拍攝宣傳片時，都有些危險，因為現場地下很跣，以前自己後生會去搏，亦因此多次受傷，現時懂得錫身，加上正拍劇，若傷了都不知如何是好。他又指現時內地工作很專心，不似在香港太多應酬。
拍劇遇陳凱琳
說到有指吳卓羲、王祖藍都離開無綫，高鈞賢說：「好難講，個個諗法唔同，自己因為想趁住年輕，大陸市場又大，想出外闖闖，不過都唔容易，好多嘢都要重新嚟過。」
高鈞賢又指以前於無綫拍得古裝劇多，好多打戲、化妝同埋黐頭套方法都較熟，亦是一大得着！故有機會都希望返TVB拍劇。他亦指於大陸拍劇，不時會撞到舊同事，之前就與無綫劇《張保仔》劇組的監製梁材遠及陳凱琳等相遇呢！
文：影視組