盧巧音重新出發 造人隨緣
重新在樂壇出發的盧巧音（Candy），告別大型唱片公司重投獨立公司，專心做好歌手身份，更在今年年底舉行她夢寐以求的演唱會。對於生兒育女計劃，Candy只能大呼矛盾：「又想要，但係又有好多嘢想做。」
出身獨立樂隊的Candy名成利就於主流唱片公司，踏過紅館上過頒獎台，嘗試過所有歌手夢寐以求的經歷後，早年選擇離開樂壇，專心幕後工作及做好人妻的崗位，沒有任何歌曲發布亦鮮有在公開場合現身，但不代表Candy放棄了音樂，她說：「經過呢幾年思想沉澱，冇歌出冇見人，呢段時間就係畀機會自己諗清楚，再出嚟表演應該用咩形式。」
老公會幫手
終於Candy再度投身獨立公司，選擇跟丈夫Sammy的Kolor樂隊和組合Fabel一齊共事，同時她在心態上亦有改變：「我覺得應該做番個歌手嘅身份，唔好太八卦，唔好好似以前咁咩都關自己事，雖然滿足感好大，但自己年紀唔細啦，唔同以前好多精力做咩都得，係時候將工作分畀其他人做，畀機會後生仔。」
而十二月底舉行演唱會的她，自言對今次演出期待已久﹕「人生中第一次有交響樂團一齊合作，我都好緊張同期待。」更表明做好演出是目前的唯一目標：「老公都會幫手，雖然佢都忙緊Kolor嘅工作，但兩公婆冇所謂啦，之前佢哋開騷都係我幫手。」
旁人意見多
工作排得密密麻麻，兩人的「造人大計」如何安排？她就慨嘆：「隨緣啦，有工作都要照做，其實咁耐以嚟都有好多意見，有啲人叫我哋唔好plan，順其自然。但又有啲人叫應該要plan吓，都唔知應該聽邊個。」對此Candy亦大呼矛盾：「我哋其實都想嘅，但又覺得好似未係時候，未賺夠錢，我個心未夠定，要個人定啲先。所以隨緣啦，有就開心，冇咪繼續囉！」
採訪：曹家誠