蔡思貝激吻床戰輕鬆完事

前港姐蔡思貝（Sisley）在無綫劇集《名門暗戰》飾演泰拳手，首次在劇集中亮相電視框的Sisley表示興奮又緊張，作為新人的她對拍劇充滿好奇心，她笑謂：「我發覺睇playback同睇剪好加埋配樂，個效果好唔同，我睇番個宣傳片先知，原來嗰日我拍咗咁多嘢，出到嚟得兩秒！」

無懼批評

在劇集拍攝期間，Sisley獲益良多，從錯誤中學習，曾撞板在拍哭戲之前「未拍先喊」，到真正埋位卻情緒溜走而深深不忿，後得同劇的視帝黎耀祥指點，她說：「佢同我講：『你人生流流長，你要拍喊戲仲有千千萬萬場啦！使乜咁介意啫！』又教我唔應該埋怨自己拍得唔好，只要肯定自己下次做得比今次好就可以喇。（害怕被人彈？）預咗o架喇，咁彈亦都係好事，因為彈咗先知道自己有啲咩唔好！」

Sisley今次在劇中亦有不少新嘗試，除要獻上螢幕初吻，更將床戲搬上擂台，不過Sisley對於跟蕭正楠共吻、床戲未覺緊張，她笑謂：「我信導演，因為我同佢比較熟，拍嗰時唔緊張，佢哋個個都喺度講笑，最後好輕鬆就完事，但最好笑係我拍之前去咗食泰國嘢，我仲專登唔食生蝦，避咗陣大蒜味，點知佢（蕭正楠）就講笑話自己特登食埋蒜頭先嚟！」

文：影視組