Kay無懼風雨繼續獨家村
謝安琪（Kay）在崎嶇的十年星途裏，被中傷過、被扭曲過、被針對過，周身傷的她想過學打工仔寫辭職信中途「劈炮」，可是睇通想透後，Kay選擇了拒絕攀關係、求妥協，反而繼續活在自得其樂的獨家村。如果無敵是最寂寞，那麼這位民選女神，肯定更寂寞。
謝安琪自從走過那條「囍帖街」後，收入、人氣，連帶負面新聞都接踵而至，星途曲折又離奇。在最新廣東碟《KONTINUE》中，Kay決意告訴大家會繼續堅持走認為是對的路，那怕風吹再雨打。她說：「以前啲包袱係因為成日畀人針對，好唔舒服，畀人扭曲我講嘅嘢，話我心腸唔好、話我抽水。面對呢啲苛刻嘅風氣，我都會唔適應，有時對我都好傷害。」
EQ高抖走負能量
當年受到千夫所指，Kay一時三刻反應不過來，試過一刻想「中場棄權」：「有諗過放棄o架，個個打工仔都諗過寫辭職信，但我冇得寫信唔撈，當我攰嘅時候會選擇抖抖，但唔會真係放棄嘅！」 誰說女神容易做，除咗樣靚身材正，Kay最叻是EQ高，最終出走到台灣發展當散心，學識自我免疫負能量。
朋友易交，知己難求，新歌《獨家村》是Kay的個人寫照。她性格內向，不愛social應酬，但要在「識人好過識字」的圈子裏打滾，其實相當蝕底。她說：「我喺呢行唔係好活躍，放工就返屋企食飯，完全喺呢行冇社交圈子，我反而鍾意用文字同人溝通，好柏拉圖式，所以有幾個傾得埋嘅好朋友。」
拒私人生活遭入侵
自封是圈中獨家村的Kay一直堅持拒用facebook，當大家在「Up相」、「呃like」、「打卡」的同時，Kay在家中專心相夫教子：「數碼世界入侵我哋太多喇，令到自己好似冇真實咁生活緊，我唔需要太多人去確認我嘅生活開唔開心，我生活只係專心對一個人好、專心湊小朋友已經好夠。」
服裝：Little Black Dress HK
髮型：Conney Lai
化妝：Khaki Yan
文：蔡菇