謝霆鋒Chok爆抗寒
謝霆鋒前日出席為英皇代言的新樓盤發布會，樓盤開售即大賣，他即晚相約老闆楊受成及好友容祖兒到跑馬地一間星級法國餐廳敍舊兼慶祝，飽餐一頓之後，霆鋒貫徹chok爆作風，懶理氣溫驟降，單手插袋型爆上車。
近年經常四圍飛的謝霆鋒，最近被英皇集團（國際）有限公司邀請成為最新樓盤「維港峰」委任為項目代言人，霆鋒前日以一身型佬打扮出席樓盤發布會，活動後，他相約英皇一姐容祖兒及老闆楊受成在跑馬地星級法國餐廳晚膳歎法菜，順道祝樓盤開售大賣。
請教生意經
大忙人霆鋒近日甚少時間留港，席上三人邊食邊傾，雞啄唔斷，雖然三十出頭的霆鋒已貴為CEO，仍不時向老闆請教生意經。眾人食至晚上10時許始離開，步出門口時甫見記者拍照，他們即笑笑口打招呼，但未有回答提問，加上晚上氣溫驟降，祖兒已披住頭巾、身穿大褸，仍被冷風吹到縮吓縮吓，她轉身向老闆和霆鋒揮手道別後便急急腳上車走人，至於尾隨的霆鋒，無懼寒流，繼續chok爆兼單手插袋施施然慢步上車，然後由司機接載返歸。
就飯局一事記者昨日致電經理人Mani，她說：「其實都係普通食飯，冇乜特別，因為佢哋好耐冇見，霆鋒聽日（今日）又要走喇！所以約埋一齊食飯聚一聚！」
文、攝：追蹤組