陳敏之忙碌人妻未度蜜月

英皇鐘錶珠寶主席楊諾思昨日出席珠寶活動時,自爆每年為女兒儲一顆鑽石,留待將來寶貝女出嫁時,串成一條鏈做嫁妝送給她,認真有心思!而結婚兩個月的陳敏之,仍陶醉新婚日子,但因忙拍劇,未與老公去honey moon。

昨日英皇珠寶舉行「Timeless is Now」珠寶首飾預展,大會特別邀請了藝人陳敏之及前港姐朱千雪示範數百萬元珠寶首飾,而英皇鐘錶珠寶主席楊諾思亦親臨現場,更即場佩戴逾1500萬綠寶鑽飾,化身模特兒,閃耀全場。問她可有珠寶收藏?她說:「我鍾意鑽石同玉,不過綠寶係我嘅生日顏色,所以我都特別鍾意。(先生有冇送過咩首飾畀你?)佢送過一粒糖形切割綠寶戒指畀我,再由我自己設計個托,所以係無價寶。」她又表示每年會為女兒儲一顆鑽石,留待將來做嫁妝:「每年送一粒,到佢結婚時就串成一條鏈送畀佢,一來鑽石升值,二來裏面有佢成長嘅故事,好有意義!」

朱千雪恨收鑽飾

同場的陳敏之就佩戴五百萬元煙花鑽飾,笑言令她憶起結婚的時候,她甜笑說:「我結婚嗰陣都有放煙花。(習慣新婚生活未?)習慣喇,啱啱兩個月,時間過得好快,有朋友祝我哋結婚兩個月快樂,我都唔記得咗,都冇慶祝,喺屋企食外賣,因為依家開緊劇好忙,聖誕都要開工,我地都未honey moon,諗住做晒嘢輕鬆啲先去。」她自言也有收藏首飾,希望留給女兒做嫁妝,她笑說:「但如果生個仔點算呢?(送畀新抱?)睇下佢乖唔乖啦!」

而港姐朱千雪自言從未收過別人送贈的珠寶,希望婚前可以收到,記者笑指她是否有所暗示?她說:「如果自己要求就冇癮啦!」男士們應該識做吧!

文:名人組