張智霖撩合作搵阿佘剃鬚
近年人氣爆燈的張智霖（Chilam）及今年視后大熱佘詩曼昨日榮升廣告天王天后，足證吸金力驚人！這對過氣緋聞男女獲獎後勁風騷，阿佘High爆向Chilam「批(月爭)」，Chilam則提議兩人可拍廣告幫對方化妝及剃鬚。
佘詩曼及張智霖（Chilam）昨日在《TVB周刊最強人氣品牌大獎2014》頒獎典禮中獲頒「最強人氣廣告天王天后」殊榮，胡楓及羅蘭則奪「最強人氣廣告拍檔」。近期模仿Chilam神似的藝員張振朗及「少女阿佘」蔣家旻同場扮演正版，Chilam亦大讚張振朗扮得似。
阿佘及Chilam這對過氣緋聞情侶同台沒有避忌，不時有講有笑，兩人均表示很開心得到廣告商支持及信任，但拒透露收入暴漲多少，問到會否想合作拍廣告？Chilam說：「若干年前合作拍過婚紗廣告，我哋仲有好多可能性，可以拍運動品牌，或者化妝品，我幫佢化吓妝，又或者係賣鬚刨，佢幫我剃吓鬚。」問到會否與太太袁詠儀合作？Chilam晒命說：「不嬲好多人搵我哋。」阿佘即向Chilam「批(月爭)」，並笑說：「發達啦你！」Chilam續說：「但好多係食得嘅嘢，要好清楚成分先會代言。」
聖誕盼樓價跌
提到林峯將不出席無綫台慶頒獎禮，其拍檔阿佘說：「可能佢突然趕到嚟呢？我投咗佢票，今年係一人一票好公平。」Chilam亦說：「未必唔到就冇獎嘅！（睇好邊個得視后？）梗係阿佘啦！」
其後，張智霖主持ifc商場「JINGLE BAO」亮燈揭幕時，他透露自己聖誕會送禮物給妻兒及朋友。他說：「之後我又會去韓國拍《一路上有你》，我已經買咗禮物送畀Super Junior嘅金希澈，節目入面仲有田亮夫婦同何潔夫婦，諗緊買乜畀佢哋。」他坦言聖誕願望是香港樓價下降，並希望買樓送給自己。
文：影視組