蕭正楠半夜餵飽大食翠如

藝人黃翠如與男友蕭正楠打得火熱，日前二人趁有四天假期到日本東京旅行。前晚近11時完成開心之旅回港，蕭正楠先行出閘，突見大批傳媒顯得有點尷尬，他說：「好耐冇放過假，今次主要為台慶頒獎禮挑選戰衣，話晒都係公司派對，要準備一吓。」問是否早前與歌手吳若希傳緋聞，今次是與女友箍煲之旅？他說：「唔係，係想放假啫！」

15分鐘後，黃翠如獨自推着三個行李篋出閘，笑容滿臉的她被問此行「爽唔爽」？她笑說：「講啲咁嘅嘢呀！（開心？） ＯＫ嘅。（男友為緋聞而箍煲？）呢個太搞笑，你唔講我都唔記得。」對於男友表示奪視帝便迎娶她，她說：「佢都冇提名視帝。（未嫁得出係咪好傷心？）問埋啲咁嘅嘢。」及後她會合男友蕭正楠並駕車離開。

打得火熱的黃翠如與蕭正楠大方任影。

黃翠如講述東京遊，笑到四萬咁口。

玩四日唔夠喉

昨日黃翠如出席公開活動時，笑言旅行日數永遠都覺得不足夠，又指去日本是由男友提出：「因為得幾日冇乜地方選擇。（蜜月？）完全唔關事，要咁寫都冇乜所謂。（買好多嘢？）食嘢多啲，不停咁食，凌晨都好肚餓要去便利店再食，我不嬲都好大食。（箍煲之旅？）寫乜都冇乜所謂啦！（地位穩定？）唔係嘅，娛樂新聞冇乜所謂。」她透露拍拖至今未試過以不好心情對住大家，亦從來沒嘈交。問到結婚會否到主題公園行禮？她說：「祖藍？咁遠嘅嘢唔諗住，我從來都唔諗o架！」

採訪：外娛組　

文：影視組