衞蘭不忿：都唔係好肥啫
曾被黎明嘲笑「肥過部電單車」的衞蘭，為紅館個唱進行3個月地獄式減肥，成功減磅後自信爆燈，以「有圖有真相」來反擊黎明的金句，又請來「重量級」嘉賓鄭欣宜做對比，欣宜更自嘲「肥過坦克車」力撐衞蘭，認真唔話得！
衞蘭（Janice）前晚在紅館展開一連兩場的「衞蘭JANICE WALKING TO THE FUTURE LIVE2014」，請來JW、李治廷和鄭欣宜等做嘉賓，反而妹妹衞詩和所屬公司老闆黎明未見人影。成功減磅的Janice全晚不斷為自己身形平反，她先向歌迷呻苦表示3個月來只食烚雞和烚菜，又向fans「央求」零食：「有冇人有零食喺度？如果你請我食薯片，我同你影selfie。」
然後她又舉例力證，在大螢幕播出三張超級大肥佬騎電單車的相片，Janice續說：「咁呢啲咩嚟o架？我唔係勁瘦，都唔係好肥啫吓嘛？」到嘉賓欣宜出場時更不惜自嘲來撐Janice：「我肥過部坦克車啦！有我企你隔籬，顯得你好瘦！」
謝安琪吊高練武功
完騷訪問時，Janice坦承想藉機為自己身形平反，更認曾為黎明的金句而傷心：「開頭有介意，不過知佢講笑啫，佢講嘢好多層次，可能我5年後先明。」有傳她與黎明因續約問題鬧不快，問到為何老闆未有捧場？她無奈說：「唔知喎，佢知我好想佢嚟睇，可能忙緊電影嘢啩。」而Amusic唱片公司高層王凱文昨日透過電話回覆指黎明剛在內地錄完節目《星星的密室》，雖前晚已返港，但忙於工作而未有到場，絕非因為續約有分歧傳聞，更指公司派出大量員工協助Janice演出。
另外，前晚有份捧場的謝安琪在微博上載吊威吔的相，凸顯豐滿身材，原來是為無綫新劇《殭》練武功，更被威吔整瘀手腳。
文：音樂組