徐佳琦廣東話差 主角變串星

來自上海的「寰宇小花」徐佳琦（Jackie）早於八月下旬被《好報》獨家披露與圈中筍盤「鑽石王老五」馬國明（馬明）撻着後，知名度火速上升，可是戀情卻隨即「見光死」。Jackie於訪問中親證二人自被本報記者影到後，大家已沒有見面，但仍有以短訊保持聯絡：「嗰次之後真係未見過啦，因為都驚再被人影到，但大家仲有傳吓短訊嘅，但都係好少，（內容係？）都係朋友互相關心咁啦。（有咩擇偶條件？）其實都係睇緣分，因為就算你有好多計劃，但遇到嘅人又唔係計劃內嘅人都冇計o架！（馬明係咪你計劃內嘅人？）我真係唔係太了解佢，因為識咗冇耐就畀你哋影到喇！」她又謂現不會單獨與馬明約會：「我哋一直都係一大班人一齊玩，之後都可能會成班人食飯嘅，單獨就唔會喇！」

做呢行有顧慮

至於會否擔心外界認為借馬明宣傳博上位？Jackie表示事件發生時未有想及太多，但坦言事後仍有少許擔心：「不過自己唔係咁，相信大家會了解，我想大家集中番喺我嘅工作上，同埋我覺得因為我同佢都係做呢行，被人影到先會有咁嘅憂慮，但我哋都係認識吓，交吓朋友啫。（咁工作機會係咪多咗？）我承認訪問係多咗，但其餘工作係冇改變，依家都係做緊之前接落嘅嘢，之後亦有自己嘅工作安排，所以影響真係不太大。」

與馬國明同車被撞破，徐佳琦連忙擰歪面避鏡頭。

放大圖片

住劏房儲首期

雖然知名度因戀情曝光在短時間內驟升，但居於舊式唐樓劏房的Jackie卻無懼世俗人的眼光，誓必以儲錢置業為奮鬥目標：「其實如果要租大啲地方嚟住都住得起，但自己最想係儲錢買樓，呢個係我一直以來嘅工作目標，（估計幾時可完成目標？）最主要係我嚟咗香港做嘢只有三年，未拎到香港永久居民身份證，買樓要額外畀樓價15％作為買家印花稅好唔抵o架，如果唔係都一早買咗，（即係你有舊錢喺度？）係啊，我有首期o架喇，不過喺香港都要等多四年先會出擊，依家就不斷有問媽咪意見，諗住暫時喺家鄉上海買咗樓先。」

徐佳琦無懼別人目光，為儲錢不惜住劏房。	徐佳琦樣子甜美，前途無可限量。	慳妹徐佳琦連日來都着同一件數字Ｔ恤。
放大圖片

欣賞青雲演技

三年前隻身來港欲闖一番事業的Jackie透露自己原本對廣東話一竅不通，現仍處於學習階段，她還隨即自爆因沒有一口流利的廣東話而錯失擔正電影女主角的機會：「講廣東話唔叻真係好輸蝕，因為之前有套同吳鎮宇及鄭中基拍嘅港產笑片，自己原本係女主角，但後尾部戲話要一個Local（本地）女仔，所以變咗客串角色，（戲份少咗幾多？）少咗好多，自己都好傷心同失落，加上客串淨係去到片場先知要做咩，得兩個鐘做準備，我最記得有次要講『吹雞搵人』，講咗好多次都講錯，因為我完全唔知係咩意思。」她又謂希望日後可與影帝劉青雲合作，非常欣賞其人品及精湛的演技。

一件衫重複着

Jackie早前被本報拍得連日來均多數身穿同一件T恤，她大方表示自己可算是一名慳妹，但只會慳在自己身上：「其實平時用錢都係買護膚品多，衫又有贊助唔使點買，不過我只係慳自己，都會請朋友食飯，因為朋友對我嚟講係好重要。」她直言難忘最初踏足香港時大感孤單，所以十分重視友情。

採訪：車綺敏

攝影：司徒國榮

服裝：PENNYBLACK

化妝及髮型：Dabby Kwok @ MAKE UP FOR EVER ACADEMY