梁烈唯重拾自信 做真漢子
梁烈唯（唯唯）近年劇接劇，最近事業又再起飛，結婚做人夫之餘又接拍《飛虎Ⅱ》，首次「撇甩」搞笑形象，做個「真男人」！入行多年，唯唯亦感激所有對他提點過的「人生」前輩，並學識對娛樂圈新聞一笑置之。
對於自己有份參演的劇集爆紅，梁烈唯（唯唯）坦言開心：「任何一套劇都希望得到大眾歡迎，對上套劇（《使徒行者》）我好幸運被挑選做『木蝨』呢個角色！」對於再做蠱惑仔，唯唯指：「我諗要有新突破，而監製就設計到呢個角色好懦弱怕事，所以我就從佢嘅身體語言同動作，都話畀人知佢好冇自信。」
令人改觀
唯唯直認自己有時亦會無信心：「如果將人生比喻成100%，我覺得自己都有一半係冇自信，但就冇『木蝨』咁懦弱，其實我做呢個角色有啲遺憾，到最尾都未充分掌握佢內心世界。可能我人生入面缺少呢個部分，所以好難掌握，覺得自己未能自然流露！」
他覺得所有經歷都能幫他投入不同角色，他坦言：「細個可能會好唔喜歡捱苦，依家覺得如果冇呢啲階段，可能個人會更加浮，所以依家會感恩發生過嘅一切！」他又指《飛虎Ⅱ》對他很重要：「係我人生入面一個好重要嘅角色！呢個角色本身唔係我做，係監製畀機會我！係我演咁多角色入面最正直最man，最能夠承擔壓力同責任！亦令好多人對我改觀，覺得我都可以唔搞笑，畀人有tough嘅一面。」
問到拍戲的辛酸，他直言拍《飛虎Ⅱ》比在沙漠跑馬拉松更「惡頂」：「如果冇班兄弟一齊捱應該好難完成！沙漠嘅熱係熱得乾燥，唔會周身濕晒，即使50度都唔夠喺香港37度喺鬧市着住飛虎衫拍劇咁辛苦！」
感激前輩
對自己走到今時今日，唯唯對很多人都充滿感激：「有一個我之前未提過嘅人，就係Chilam（張智霖），佢冇刻意教我，但佢待人處事同工作態度都值得學習，尤其佢對自己人生嘅幽默感，我要繼續努力！校長（譚詠麟）都教我娛樂新聞就係娛樂，唔需要認真對待，令自己唔開心！」
化妝：Circle Cheung(ndnco.co)
髮型：Kel Fung@HH hair nail
服裝：MUSIUM DIV.@I.T
文：專案組
攝：張福宏