林德信封口不提感情事

林德信（Alex）、吳千語及盛君早前合拍新片《青春鬥》。演純情怕醜仔的Alex，為追求「女神」盛君而加入武術隊。他笑言因角色只得18歲，故未有親熱戲而感失望。現實中，在外地留學的Alex表示，到高中才與女學生同班，又指當時身邊男同學性格全變：「佢哋個個有目標，但我就覺得要真實啲，所以繼續踩板、打波，唔會重色輕友，結果追唔到女仔。」不過，千語則爆Alex不如角色般保守：「戲裏同我有乜講乜，但現實佢收得好埋，把口撬極都唔肯講另一半，係我遇過數一數二口密嘅人。」她又謂常與對方分享私人事，Alex卻嫌煩懶得覆短訊，難道是怕女友詐型？Alex則笑稱拍攝兩個月，跟千語日見夜見已講太多，千語卻笑他是「獨孤精」：「佢好享受個人時間，會自己一個做運動。」

不愛花言巧語

而飾演千金小姐的千語，於片中為「大師兄」徐正曦加入武術隊。她自言直率性格與現實相似：「我講嘢唔轉彎抹角，有時得罪人都唔知，對熟嘅朋友講嘢好直接，有時冇理到人感受。有次朋友試褲我話佢好肥，有啲朋友接受到就覺得好好，因為我會反映真實意見，但唔熟嘅人就會尷尬，依家會講少啲嘢免賴嘢。」她又指未曾得罪男友林峯，自己也不介意別人對她坦白，問是否男友沒甚挑剔？千語說：「同佢相處最直接，唔使轉彎抹角。（男友話過你？）佢都係個直接嘅人，唔好睇就會話唔好睇。佢都話過我着衫唔靚，其實我鍾意聽啲真實意見，唔鍾意人成日讚我，話我着咩都好睇。」

林德信（左起）、盛君及吳千語大談拍攝趣事。

直腸直肚的千語自言唔識轉彎抹角，得罪人都唔知。

盛君打得最甘

提到戲中不乏動作場面，有跆拳道底的盛君打得最甘。她事前也特地去學中國傳統武術，片中又大展劍法將Alex匿名送的花斬碎，她更在「五角形獨木橋」上拍高難度打戲，認真犀利。連續兩周吊威吔的Alex則笑道：「吊威吔場口我永遠拍得最快，因為我叻，自己都感到驕傲，因為我哋係堅打，啲動作都真係唔容易。」

場地：Pont Neuf Restaurant

服裝：Lane Crawford（千語）、mossy（盛君）

文：影視組　

攝：劉智源