葉麗儀靚聲百唱不厭
「又有喜，又有愁，就算分不清歡笑悲憂」是經典歌手葉麗儀的人生寫照，轉眼已入行45年的她，《上海灘》唱足34年不厭倦。無論事業抑或人生都有過高低起跌，現已笑看人生的葉麗儀決定為自己多年的歌藝生涯作一個小總結，首次舉行入行紀念騷，亦是她30年來才再舉行的個人演唱會。
葉麗儀（Frances）以靚聲縱橫歌壇近半世紀，原來從未想過為自己舉行紀念演唱會，明年1月將於伊館舉行兩場《葉麗儀45年香港情演唱會》，也是多得演唱會之父張耀榮一句玩笑而成事：「上年10月做完《3個女人一個墟》，喺後台度講到我年紀最大，唱咗幾十年，耀榮叔就話點解你成日自己唔唱o架？」雖然耀榮叔已魂歸天國，但Frances今次個唱依然和其女兒的永耀娛樂合作：「我仍然喜歡將呢個project畀番佢個女做，因為同耀榮叔感情好深。其實30年前耀榮娛樂成立嗰時，第一個藝人就係我，農曆新年喺伊館做咗三場演唱會。依家同佢個女又喺伊館做，好有意思。」而Frances自從那次後，便再未試過在香港單獨舉行演唱會，故今次個唱別具義意。
觀眾反應熱烈
名曲《上海灘》唱足34年，Frances坦言絕不生厭：「呢首歌唔會厭o架，因為每次一唱觀眾反應都好熱烈，呢種感覺說話好難形容，係心中嘅滿足感，錢買唔到。」在芸芸歌詞中，她最喜歡「又有喜，又有愁」最後一段：「呢個講人生好貼切，黃霑寫得非常好，無謂斤斤計較有幾多愁，人唔會萬事都順利。」
無論是家人或Frances自己都經歷過大病，但她仍堅毅的一一撐過來，配上一頭標誌性的短髮，絕對稱得上是女漢子，但她謙虛否認：「唔係，我只係家庭主婦。做人一定要正面，如果選擇開心咁過人生，自己感覺好啲，身邊家人朋友都會好過啲。如果成日憂慮控制唔到嘅嘢，我覺得好浪費精力。」
文：音樂組