官恩娜出嫁反傳統 唔怕蝕底
即將嫁給混血男友的官恩娜（Ella）婚禮計劃玩中西合璧，反傳統用火雞、椰青過大禮，收禮金則用歐元結算。不過這位準人妻竟婚前大蝕「底」，踎低合照時不慎露出粉紅色底底，果然「紅」事停不了！
官恩娜（Ella）昨日身穿紅色連身短裙，出席商場聖誕裝飾開幕活動，她即席以口風琴演奏聖誕歌，大會亦安排一對混血花仔、花女，向待嫁的Ella送上香吻。當Ella踎低與小朋友合照時竟老貓燒鬚，不慎春光乍洩，露出粉紅色內褲。
Ella表示聖誕節將會與未來老爺、奶奶度過，問到雙方家長可有見過面？她說：「未正式見過面，但之前佢哋有嚟睇我做許冠傑演唱會嘉賓，有見過。嗰時婆婆仲喺度，我仲諗住整件褂畀佢着，可惜佢最近過咗身。」
鬼妹仔性格的Ella透露原本想婚禮形式忠於自己大玩「Freestyle」：「我想唔着褂、唔擺酒、連『上頭』都唔想，但係畀人話。（旅行燒烤結婚？）可以考慮喎，BBQ！」
火雞過大禮
提到按傳統儀式過大禮，Ella笑言要體現中西合璧：「可以用火雞過大禮，海味變火雞，椰子變椰青，咁隻火雞仲綁唔綁紅絲帶好呢？」提到西方結婚習俗是由女家送禮金給男方，她即時轉軚，笑說：「咁呢方面我就好中國人！（八位數禮金？）咁就要歐元，佢（未婚夫）係法國人嘛，其實我媽咪真係冇所謂，依家又唔係賣女。」
文：音樂組