安仔睇齊祥仔 有信心3度封帝
無綫台慶頒獎禮昨日舉行記者會公布候選名單，近四十位藝員出席，今年視帝形勢將會是郭晉安（安仔）與黎耀祥（祥仔）之爭，安仔自爆已經準備好「全家」上台攞獎。視后方面田蕊妮宣布「投降」，令頂頭大熱佘詩曼（阿佘）更加「冇對手」，攞獎呼聲高唱入雲。
無綫《萬千星輝頒獎典禮2014》將於下月十五日舉行，「最佳男主角」候選名單包括黎耀祥、郭晉安、林峯、黃宗澤、苗僑偉等，離巢投英皇的林峯雖然有份候選「視帝」，但始終已經不是無綫「親生仔」，相信封帝機會不大。「視帝」形勢會是《名門暗戰》的黎耀祥與《忠奸人》的郭晉安之爭，安仔若再下一城，將會追平祥仔成「三屆」視帝。
「全家」攞獎
安仔對三奪「視帝」滿有信心，更準備好「全家」出動上台攞獎，他說：「睇觀眾投票，阿峯、祥仔都好多fans，我會努力拉票，希望大家幫幫手投爆Server，創造高投票奇迹。頒獎禮戰衣已經準備好，設計師知我係住家男，將我成個family肖像印晒上去，睇到都感動到匿喺廁所喊。」
祥仔昨日因要拍攝其代言美容中心廣告而不能到場親自拉票，不過他坦言沒所謂，最緊要是觀眾投票，說到林峯不續約都獲提名，他笑言：「我都支持阿峯，我都係佢fans，阿峯為TVB做咗咁多，冇功都有勞，畀佢唔過分，佢應該分5000萬畀我。」問到劇集《名門暗戰》熱播中，會否覺自己佔優時，他說：「少少啦！之後劇情會愈來愈緊張，希望有後勁！」
阿田難冧莊
「最佳女主角」候選名單則有佘詩曼、鍾嘉欣、田蕊妮、楊怡、徐子珊等，但「視后」形勢卻是阿佘獨領風騷，除了《使徒行者》的「釘姐」角色受歡迎，加上最近橫掃新加坡及馬來西亞「視后」，着實霸氣十足。阿佘與田蕊妮皆臨時出席撐場，阿佘表示：「本來要配音，但係臨時改咗。信心都有，希望觀眾投票，佢哋投票好重要。」至於「視帝」，阿佘表示若能投票會投給林峯，因「爆Seed」加上「釘姐」才產生化學作用。
原本出席記者會的鍾嘉欣因病缺席，加上田蕊妮亦宣布「投降」，現場令阿佘更加「冇對手」，阿田表示：「對自己演戲有信心，但冧莊真係好難，阿佘回歸喎，自己投票都揀阿佘，釘姐角色我都好鍾意、夠全面。」
採訪：影視組