阿余扮靚拉票釘實三料視后
出爐馬來西亞視帝、視后郭晉安及佘詩曼昨日凱旋回歸，已袋走新加坡及馬來西亞獎項的「雙料視后」阿佘被問到下月15日舉行的無綫台慶頒獎禮得獎信心時，笑言要「着靚啲」，謙稱要靠觀眾投票。
《TVB馬來西亞星光薈萃頒獎典禮2014》（前名：Astro我的最愛頒獎典禮）前晚圓滿結束，佘詩曼憑《使徒行者》「阿釘」一角，繼上月在新加坡《星和無綫電視大獎2014》後再次封后，「雙料視后」阿佘昨日與三度奪視帝的郭晉安，以及楊怡、羅仲謙、陳敏之、胡定欣，李詩韻、鄭俊弘等凱旋返港。
阿佘獲fans接機及送花，貴為「雙料視后」的她說：「好開心，（開party慶祝？）冇，尋晚工作到凌晨今朝一早出機場，不過最開心《使徒行者》做咗大贏家，我諗監製最開心！未知會唔會搞party慶祝。（有信心攞埋台慶視后，做三料視后？）唔知，希望觀眾繼續投我票。（尋晚啲衫唔夠楊怡性感？）TVB頒獎禮嗰晚我着靚啲囉，（晒事業線？）冇刻意咁諗，靚就ＯＫ啦！」
安仔信心一半
第三度獲頒視帝的安仔表示好開心：「馬來西亞啲fans好熱情，宣布前我信心一半一半，楊怡同我講：『大佬，部攝錄機唔係對住你，陣間執生！』我瞄一瞄，又係喎，個心沉一沉。（攞獎點慶祝？）同家人食飯，同埋話畀個仔知乜嘢係頒獎禮，要努力付出，先有收成。（有信心攞埋台慶視帝？）每個頒獎禮賽制唔同，我信心一半，希望觀眾投我票，希望今次有攝錄機對住我！」
楊怡志在參與
楊怡與羅仲謙昨午同機抵港，但分開出閘，對於失落視后，她說：「唔會唔開心，志在參與。（有傳羅仲謙向你求婚？）多謝關心，結婚要父母批准，總有呢日，到時會同大家講。」羅仲謙說：「唔係（求婚），工作先，（效法蕭正楠做視帝至求婚？）有提名已經好開心。（楊怡套性感衫要你批准同檢查？）佢真係好靚，但唔使，女仔自己識。」
此外，楊怡前晚在慶功宴上笑言，想演18、19歲撲蝶角色。高海寧則謂在台下已提自己不可以喊，但始終忍不住，沈震軒則指高海寧選港姐時，是由他帶出場，現雙雙獲「飛躍進步」獎，感覺特別鼓舞。
文：影視組