阿倫被寸守財反擊志偉埋單扮醉!
譚詠麟入行四十年，昨晚不少圈中好友出席其特輯節目的錄影。好友曾志偉即場爆料指譚詠麟為人「守財」，多年來賺得錢多但未請過食飯和去旅行。阿倫聽後絕地反擊，指曾志偉才是守財之最，經常黐飲黐食。
「樂壇校長」譚詠麟入行四十年，昨晚他在銅鑼灣為節目《譚詠麟笑唱人生40年》錄影，圈中好友曾志偉、鍾鎮濤、彭健新、李克勤、林子祥、徐小鳳、鄺美雲、鄭文雅、湯寶如、江欣燕、梁琤等人出席。身為好友的曾志偉未改多口本色，笑說：「諗唔到咁都過到40年，真戥佢開心，可以紅咁多年、又賺咁多錢又做咁多善事，但又冇請人食一餐飯、冇請過一次旅行。（佢留畀個仔？）咪係囉，佢仲叫我錄節目前唔好飲酒，怕我亂講嘢。」問到最欣賞譚詠麟哪方面，曾志偉不諱言：「守錢守得好緊。（好多身家？）難以估計，可能佢自己都唔知幾多，我估緊佢多啲定成龍多啲。」
買阿伯鞋着成個月
譚詠麟得知被曾志偉批「守財」後，亦毫不客氣還擊說：「嘩。守得過佢？佢有無埋過單呀？每次一埋單就扮飲醉，佢已經係黐飲黐食大家庭主席，佢識咁多富豪，唔使理我哋啦。（你身家多定成龍多？）唔好講呢啲嘢。（你幾錢身家？）點知啫，錢會生錢，上海仲想開多3間食肆分店。（錢多到孫都夠用？）唔好咁講，辛苦錢。」
同場，鍾鎮濤笑言阿倫為人知慳識儉，他說：「有次出埠登台，佢對八吋鬆高鞋甩踭，佢就喺當地買咗對阿伯鞋出騷，仲着咗成個月。」同場鄭文雅帶備相機為阿倫拍照，她笑言：「唔可以低抄影佢，因為佢發福咗。平時佢食一餐係我一星期分量。」
文：影視組