阿Sa空運北京 賀陳偉霆生日
歌手蔡卓妍（阿Sa）昨日出席「wtc more世貿中心 X JOYRICH Joyful Xmas」聖誕裝置開幕禮，明天正是男友陳偉霆（William）29歲生辰，而周六就到阿Sa做壽星女，兩人為解相思，不排除阿Sa「人肉速遞」到北京為William慶生。
阿Sa聯同洪卓立（Ken）和湯怡出席活動，阿Sa以紅色短Tee大晒纖腰，因後天（22日）正是阿Sa的32歲生辰，大會特別為她送上蛋糕預祝生日，現場fans更大唱生日歌。不過，明天則是男友William的牛一，問兩人可會一齊慶生？阿Sa謂：「應該唔會啦，佢生日喺北京開fans club party。（fans重要過你？）唔係，咁呢次係佢第一次fans club生日party嘛。（你秘密人肉速遞？）度度啦！咁多人怕生命有危險！（William粉絲冇愛屋及烏咩？）大部分都OK嘅！」
生B要心理輔導
現時William在內地人氣飆升，阿Sa坦言有一段時間未見面。想男友多工作又想多見面？阿Sa謂：「係好矛盾，咁後生趁有能力梗係搵錢緊要。」她生B計劃豈不要延遲？阿Sa即言：「呢個擺埋一邊先，因近排見到朋友啲三、四歲啲小朋友煩到嘔，將我屋企搗亂，連我啲狗都怕咗匿埋晒。（有恐懼？）要準備好心理輔導先。」
Ken湯怡晒恩愛
至於Ken和湯怡以情侶檔登場，Ken早前演舞台劇與對手陳嘉寶有接吻戲，而湯怡自爆有一場Ken不知她去捧場，台上Ken見到她很愕然。問他不知女友在場，吻戲會否演得特別放？身旁的Ken即搶答：「作為一個專業演員場場演出都係好穩定，唔會加戲嘅！」湯怡即笑謂：「都差唔多啦！」
文：音樂組