王祖藍台慶求婚 李亞男喊住應承
無綫約二百位藝員昨晚慶祝公司邁向48周年台慶，期間王祖藍表演魔術時扮失誤，突然送花及巨鑽向女友李亞男求婚，亞男含淚急除手上戒指答應，然後戴上婚戒，全場歡呼！昨晚「王氏伉儷」搶盡風頭，不過視后佘詩曼及胡杏兒企正中間盡顯身價，但兩女密實讓賽，造就其他小花「胸戰」賀壽。
無綫小生花旦昨晚雲集將軍澳電視城出席節目《萬千星輝賀台慶》，慶祝無綫邁向48周年。佘詩曼、陳豪、胡杏兒、黃宗澤、郭晉安、黎耀祥、徐子珊、鍾嘉欣、田蕊妮、胡定欣及馬國明等約二百位藝員到賀，情侶黃翠如與蕭正楠亦前後腳出場。眾星玩遊戲爭奪總值480萬港元的獎品，氣氛熱鬧！
佘詩曼顯身價
全晚最驚喜一幕是祖藍及亞男情侶檔玩魔術，期間突然「表演失誤」，亞男即嚇到喊。其後祖藍捧着玫瑰花出場向亞男求婚，他說：「你話要個最驚喜嘅求婚，我度咗好耐終於等到今日，今日係最齊人。」說罷祖藍下跪：「我哋係好唔同嘅人，我當時只係兒童節目主持，你係選美冠軍，我好矮，你好高，我好複雜，你好單純。感謝主畀我哋認識，無論追你幾咁困難，娶到你，我一生都會好幸福！每一日都係恩典嘅一日。」隨即送上巨型鑽戒，亞男即含淚並除下手上戒指答：「我願意！」現場掌聲雷動，雙方家長亦有到場見證。事後亞男與祖藍孖住受訪，亞男說：「好驚喜，唔好再有下次喇！我都唔知父母喺加拿大返咗嚟！（恨嫁？）都有預備嘅。」無綫行政主席梁乃鵬更感動得抹眼淚，他表示不覺得台慶風頭被搶：「不知幾高興！」
開場排位時，視后阿佘及杏兒分別企兩位隊長曾志偉及陳百祥旁邊，阿佘更打頭陣出場顯身價，約滿在即的杏兒亦明顯獲無綫厚待，兩人均賣口乖「多謝公司安排」。問杏兒是否最後一年參與台慶？她說：「應該唔係，永遠係我娘家。（續約傾成點？）傾緊！公司畀好多選擇我。（條件好？）錢唔係考慮因素，係講感情。（同舊愛黃宗澤同場尷尬？）冇嘢！都唔同組。」不過兩位花旦打扮密實「讓露」，造就小花們鬥胸鬥性感。
呂慧儀未收身
一線花旦中以徐子珊較性感，身穿粉紅色Deep V的她露前又露後。對於排位靠邊站，她說：「年年差唔多，咁多前輩。」其他女藝員包括呂慧儀、高海寧、陳庭欣、唐詩詠、馬賽、沈卓盈、莊思敏等爆胸應戰，去屆視后田蕊妮身穿透視裝透黑Bra。
已為人母的呂慧儀穿紫色吊帶衫騷五百萬鑽飾，大晒Big爆湯碗胸，但下盤甚脹，身形仍未收身。她說：「我唔想太瘦，上圍都冇跌Cup，我餵人奶嘛！等個仔食好啲！」高海寧身穿Tube Dress騷胸，她表示有盡力Keep Fit：「成個星期飲花膠湯呀！好在上圍冇縮水！多謝阿媽遺傳！」
文：影視組