劉嘉玲曾經老土以蛻為變

劉嘉玲認同志偉所言，笑言自己由鄉下妹變成時尚人。

劉嘉玲昨晚於上海出席外灘十八號十周年慈善晚宴，同場還有丁子高、黃柏高以及少女時代前成員Jessica男友K先生（權寧一）等。嘉玲表示自己在附近也有三間酒吧和最近開了一間卡拉OK。日前曾志偉在內地活動上直指嘉玲曾經老土，是個灰姑娘，他謂當年嘉玲連廣東話都講不好，完全不懂演技，高跟鞋也不會穿，但她很努力。問到嘉玲知否志偉讚她灰姑娘，她說：「我以前都係一個鄉下妹，喺大陸嚟唔識講廣東話，佢講嘅嘢係真。我由灰姑娘變成一個好時尚嘅人，其他女仔都可以，變成My fair lady。（自己人緣好？）不嬲都好，細個係有好多誤解，脾氣唔好，依家學識咗感恩、珍惜同報答。（有好多朋友？）身邊一向都好多朋友，自己性格好好，好樂意幫人，係細個貪玩，都癲狂過，不過唔會後悔，依家想癲狂都冇咁嘅體力。」

希望增加智慧

問到他老公梁朝偉可算是她的白馬王子？嘉玲說：「都算係，佢又靚仔又有事業，但每個人都有缺點，冇人係完美，我都係，我覺得自己仲係未夠智慧，想增加多啲智慧，可以更坦然同更成熟去面對。人生有好多功課，做完一樣就有第二樣，唔好咁容易動怒，每日都會有嘢挑戰吓你，考驗你嘅耐性。」至於聖誕可會與偉仔出埠滑雪？嘉玲表示12月中要排舞台劇，應該明年才會去，她說：「出年想休息吓。（輪到偉仔開工？）係啦，佢抖夠要開工，我需要抖吓。」

曾志偉	丁子高（右）與K先生相見歡。	黃柏高（左）與太陽娛樂城高層唐才智合照。

子高包場開騷

另外，丁子高被問到太太楊千嬅日前笑言自己的演唱會不會讓他上台，對此他說：「係呀，佢驚我上咗台之後就變咗唔係佢開演唱會，會變咗我開演唱會，佢話我生日幫我搞。其實我唔係鍾意表演，係鍾意唱歌啫。下次等我自己喺紅館包場先，畀屋企人嘅私人演唱會，可能同埋囝囝Torres，佢識唱晒千嬅一首歌，叻o架。」