婷婷漏口風：冇諗過會分手
剛驚爆與名媛李桂蘭兒子戴尚安（Sean）分手的謝婷婷，昨晚首度現身，開腔回應分手原因。Sean於上周五被本報拍得與時尚blogger Cindy夜蒲兼剝衫露點，罕有性感示人的婷婷昨晚透露二人於上周四（13日）分手，否認時尚blogger Cindy介入戀情，但全程強顏歡笑，坦言曾為分手而哭，亦沒有想過會分手，明顯漏口風！
謝婷婷與Sean拍拖僅一年便分手，昨日婷婷自失戀後首度出席「PRADASPHERE展覽揭幕酒會」，同場有韓星車勝元、孔孝真、鞏俐、李嘉欣、周汶錡、徐濠縈、Amanda S.、新西蘭創作女歌手Lorde等，婷婷罕有地以超deep V性感現身，自爆真空上陣，大騷東西半球，但明顯強顏歡笑。問到與Sean的分手原因？她說：「我哋開始認識係好朋友，嗜好好夾，所以發展吓。我哋工作上合作得好好，但後尾覺得做朋友好過拍拖。」提到Sean先宣布分手？她再三強調：「唔係，係一齊決定（分手），我畀佢發布先。」
受情傷罕有超性感
問到二人拍拖一年後分手，會否覺得浪費時間？婷婷解釋一年時間不算長：「好似16歲拍拖咁，2個月時間就似一年，1年時間過得好快，我哋都好忙，我今年好多時間唔喺香港。」分手時有沒有喊？她坦言：「我哋傾嗰陣有一齊喊，好可惜，冇諗過會發生。我哋處理得好好，喊係會唔開心，但我開心我哋咁樣分手（仍然做好朋友），冇hard feeling。大家一齊出咁多trip，有好多回憶。」雖然婷婷盡力掩飾分手之痛，但一句「冇諗過會發生」明顯漏口風！
被問到分手是否因Sean上周五（14日）夜蒲溝女？婷婷說：「我戥佢慘，嗰時我哋已決定分手，但冇即刻（同傳媒）講，我哋依家係好朋友，我冇嘢。（幾時正式分手？）上星期四，我哋唔係突然分手，係大家覺得做好朋友多過情人嘅浪漫。報道出咗街，佢都有打嚟同我講sorry，我話唔緊要。其他女仔遇到佢咁好嘅男仔都會好幸福。」問到二人分手會否關她的好友Cindy事？她否認但意有所指說：「唔關事，佢（Cindy）同個個都出街，好開心佢陪Sean去玩，有時飲多咗就玩得好開心。」婷婷口口聲聲說開心Cindy陪Sean去玩，但令人感覺極為牽強，似暗寸多過真開心。
祝福安志杰新戀情
雖然婷婷已經分手，但舊愛安志杰卻剛宣布與Jessica C.拍拖，問到會否酸溜溜兼覺諷刺？她大方送上祝福：「冇，戥佢開心，係timing問題，好搞笑。」而Sean昨日亦在Instagram上載了相片宣傳他未來的慈善相展，似乎未受分手一事影響。另外，記者致電謝賢問他有否安慰剛分手的囡囡？他說：「你乖啦，唔好問我家事啦，Bye Bye！」
文：名人組