蔡志明開一站式寵物店

玩具大王蔡志明最近投資五百萬開設一站式寵物店，他昨日與太太蔡李惠莉以及長女蔡加敏一家齊齊出席開幕禮。佔地4000尺的寵物店為蔡生與他家中60多隻狗狗的御用訓練員Decky合作開設，蔡生說：「我由細到大都好鍾意狗，幾乎咩狗都養過，偏向鍾意大狗，最鍾意德國狼狗，我覺得狗好有人情味，你錫佢佢會錫番你，狗係我嘅好朋友。（點解想開呢間店？）我識咗Decky十年，屋企啲狗全部都係佢訓練，佢最近幫我訓練咗隻狗我好鍾意，我問佢有咩理想，佢話想開間一站式嘅寵物店，於是就決定同佢合作開呢間店，等佢有得發揮。呢度集齊賣寵物同寵物用品，仲有寵物美容同Training於一身。」