杜德偉氹老婆開心澳門騷公鵰同好
【蔡振龍澳門直擊】杜德偉（Alex）由香港脫到落澳門，在澳門站演唱會上繼續玩除衫爆褲，今次奉老婆聖旨，換上新款的黑白間條閃三角底褲晒巨鵰，更預告將在巡唱再創新「底」！不過嘉賓之一的準新郎蘇永康就怕未婚妻悔婚，臨陣縮沙拒絕脫掉！
杜德偉於八月在紅館舞台剝淨銀色底橫，成為一時佳話，前晚他將這股「脫掉風」吹到澳門威尼斯人金光綜藝館，舉行「杜德偉極杜世界巡迴演唱會2014澳門站」。開場不久，Alex便預告好戲在後頭：「我老婆話悶，話要換咗我《脫掉》條底褲。為咗令女士開心，等一陣男士一齊脫掉，脫到見到『奶奶滋』為止。」
提辛酸史眼濕濕
全晚最催淚的是Alex與胞兄杜德智合唱一曲送給天上的父親，期間播出父親生前錄好的歌聲，三父子齊齊「隔空對唱」。其後，Alex笑言雖在歌舞方面比不上郭富城，但普通話則比城城流利，他再用普通話大吐當年入行辛酸史時，一度眼濕濕哽咽。
Alex請來同期出道的蘇永康（阿公）擔任嘉賓，阿公下月將會舉行婚禮，不過為免未婚妻反口唔嫁，他竟「笠水」罷脫：「《脫掉》嗰part我要走先，驚趕客呀，同埋我老婆（未婚妻）唔畀，我下個月結婚啦，我驚老婆唔嫁畀我。」
裸上身勁chok下身
直到個唱尾聲，Alex一邊唱着首本名曲《脫掉》，一邊帶動歌迷勁chok下半身，之後由男舞蹈員除下他的外衣，赤裸上身與索女跳辣身舞，最後撕爛黃色底褲，只穿黑白間條閃爆底褲，可算是香港站銀底褲的「進化版」！Alex騷後訪問時表示老婆鼓勵他更換「底褲」，他指將到美加、澳洲、廣州等地舉行巡唱，屆時每站都會設計不同款式的底褲：「每場都有條新，做到Collection咁，就好似Michael Jackson啲手套，等我『瓜』咗後，都有紀念性呀。」
文：音樂組