安志杰吼JC單身 火速示愛
安志杰秘戀索模Jessica C.斷正！安志杰昨日出席活動時怕醜承認戀情，原來他趁JC甩拖即示愛，兩人拍拖只得短短幾日，已旋即到男方家中過夜，感情一日千里！
影星安志杰與藝人陳法拉昨日現身新蒲崗出席商場活動，安志杰更攜與舊愛謝婷婷拍拖時飼養的愛貓亮相。日前被踢爆因拍攝太陽娛樂電影《屍城》而撻着女主角Jessica C.（JC），二人在街頭又攬又錫，JC更在安志杰家中共度春宵。安志杰昨日穿上西裝示人，未知是否怕被大逼供，他全程大汗疊細汗，不時從口袋裏抽出紙巾抹汗，做訪問時更索性除去外套，解開兩粒恤衫鈕扣透涼。
戲假情真
被踢爆戀上JC，出名怕醜的安志杰受訪時顯得尷尬，又低頭又踱步，問到拍拖多久？他說：「幾日啦，識就識咗一年，係拍戲嗰時識嘅，嗰時我好怕醜，但JC個人好開心又好爽直。」被指女追男，安志杰即維護女友︰「係互相，碰埋就即刻撻着。（有咩吸引到你？）好多嘢吸引到我，性格啦！（身材？）你哋話呢？你哋話係咪係囉！」JC早前才與身處洛杉磯的男友Mr.Bond分手，旋即撻着安志杰，惹來三角戀疑雲，安志杰強調二人是在JC與男友分手後才發展，更笑言自己是怕麻煩的人。
至於如何抱得美人歸，安志杰表示：「知佢同男友分手就即刻追佢。（點追？）約佢食飯睇戲，美國人好easy！」又表示在JC與男友分手後一個月內將JC追到手，問到JC是否易追？他笑笑口說：「Sorry！唔係易追，係好難追o架！」
攬舊愛貓
《東網》踢爆JC到安志杰的家中過夜，問到JC是否常在他家過夜？安志杰扮聽不懂廣東話說：「我有時都去朋友度過夜。（JC成日上嚟？）唔係，前日好似係第一次，唔係成日o架！」同時他又大方承認攜帶的貓貓是昔日與舊愛婷婷拍拖時所飼養的，又直認與婷婷已沒有聯絡，婷婷亦沒有再探望貓咪，不過不擔心女友JC會尷尬，因JC知道愛貓的由來，而且JC都是愛小動物之人。
據知JC最後一次見舊愛Mr.Bond是在八月底，當時JC返美國探望，不過後來分手。JC的經理人被問JC何時與Mr.Bond分手？他表示JC為保護前度免受傷害，鮮有提及二人已分手且再沒有見面：「JC十一月返美國係去姨甥仔生日會，嗰度同Mr.Bond居住地差成5、6個鐘飛機o架！嗰次冇見面。」
文：影視組