張智霖追求無憾人生
除了「如果我是陳奕迅」之外，大概有不少人想過「如果我是張智霖（Chilam）」，撇開恍如吃了防腐劑的靚仔外表不說，Chilam擁有美滿家庭，事業正值高峰期，負面新聞絕無僅有，是大家心目中的理想人生，連Chilam本人也夠膽講句無憾。敢言無憾，並非在於擁有多寡，而是懂得珍惜，學會活在當下，拿捏生活平衡之道。如果人生是一道選擇題，原來答案不只A、B、C選項，Chilam告訢我們還有一個「以上皆是」的選項。
在外人看來，藝人是都野心勃勃，問某某明星想跟哪位名導或演員合作？有甚麼工作及角色想挑戰？列舉的名字及計劃總是一籮籮。但Chilam的答案只有一個字：「冇！」他解釋：「我入行咁多年想合作嘅都合作過，好多嘢都做過，我好心滿意足，痛苦係來自恨不得，我唔會話想同湯告魯斯合作先開心，我唔會咁單方面。」對工作上無欲無求，那是積極還是消極？Chilam肯定地說：「咁樣當然係積極，我唔係去放棄自己，我係將每樣嘢做到做好，反而推動力更大，活在當下，而唔係一邊hea住做，一邊諗住公司要三年後上巿再集資，可能人大咗，經歷過好多次失望，世事無常，冇嘢係喺你掌握之中。有太多前車可鑑，太aggressive唔見得有好結果，花咗好大力氣去爭取，反而係行多咗冤枉路，爭嚟冇用。」
最重要是活在當下
對工作上無所求，那麼看似順風順水的人生，總有一兩件引以為憾之事吧！問Chilam人生中有甚麼憾事？他答了兩個字：「冇乜！」Chilam表示無憾來自他一直追求平衡人生：「我唔係大家所定義嗰種積極嘅人，如果話一個人做嘢好aggressive，係指你好投入，可能百分之九十嘅時間都係用去工作方面，咁係唔平衡，可能會忽略咗家庭，成日都聽到有人話我好耐冇見過阿爸，所以你咪會有所遺憾。」Chilam笑言自己的野心可能比別人更大，因為他不只要求事業有所成，而是事業、愛情、親情各方面並駕齊驅，雖然進度會較緩慢，但他不能接受人生有所缺憾。
談到最理想生活，Chilam今次給了三個字：「呢一刻！」他認為人最重要是活在當下，這一刻才是現實，當然他也曾想過退休，但發現退休與理想生活並非畫上等號：「有好多人退休，錢銀方面唔需要擔心，可以過啲遠離世俗嘅生活，但並唔快樂，可能更加死氣沉沉，工作唔係搵幾多錢，而係同人去接觸、對社會貢獻以及去解決問題，生活就係不斷有好多問題，你再去解決。」
親子關係靠幽默感
而生活給了Chilam其中一道大難題就是養育兒子魔童（張慕童），當了爸爸八年的Chilam謙稱仍在學習做個好爸爸，要說技巧，他認為幽默感在親子關係中很重要，他說：「幽默感就好似潤滑劑，好多事都可以利用幽默感去解決，其實好多嘢你回頭睇番，並唔係咩大不了嘅事。」但Chilam強調並非任何事也可以用幽默感帶過，某些事必須嚴肅處理，他舉例說：「例如有關佢嘅自身安全，好似亂過馬路咁，我會好認真咁處理，又或佢會鬧婆婆，咁我都係唔容許，因為中國人要分尊卑同敬老。」
身為萬人迷的Chilam希望成為兒子的偶像，但不是以明星身份，而是作為一個普通人：「我當然想囝囝以自己為榮，但我唔想係基於我係明星，我嘅人氣，而係因為我嘅操守、我嘅人格，唔通將來我嘅人氣跌，佢就唔再以我為榮？」
不想囝囝入娛樂圈
Chilam與太太袁詠儀皆是藝人，生活在鎂光燈下，兒子難免會被波及，對此，Chilam很看得開，不會為避開狗仔隊或普羅大眾目光而影響小朋友的正常活動，他有自己一套理論：「我唔會閃閃縮縮，見到大家咪打聲招呼囉！我相信大家對我都會係正面嘅反應。」
對於兒子的將來，Chilam跟不少藝人相似，都不希望下一代步自己後塵，Chilam坦言：「呢一刻我睇唔到佢有唱歌、跳舞表演方面嘅才能，囝囝亦冇講過想入娛樂圈，但如果佢想入，我會勸佢唔好，因為做藝人係需要極好嘅運氣，我承認我係好好運，如果佢將來冇我咁好運，而我又愛莫能助，咁係好痛苦，其他工作會比做藝人更有自主性。」但跟其他藝人不同的是，Chilam並不贊成送子女到外國留學：「我嘅工作喺香港，我都熱愛呢個地方，我唔會搬去外國住，如果小朋友去外國讀書就即係要同我哋分離，佢去咗之後就未必會返嚟，因為佢已經適應咗外國生活，有自己嘅朋友圈子，可能會喺當地搵工，時間過咗就追唔番，我唔想錯過咗小朋友嘅成長階段。」
爭取時間享天倫
Chilam就算工作再忙碌，他寧願犧牲睡眠，也要爭取時間享天倫，他稱盡可能會帶小朋友去不同地方，他說：「唔單止係去遊樂場，而係去所有地方，我比較鍾意接觸大自然，例如得閒會一家人去愉景灣，遠離煩囂，呼吸新鮮空氣同享受綠化環境，最重要係畀小朋友學識保護大自然。」
採訪：陳嘉敏
攝影：吳文聰