飛虎四將賣命真英雄

馬：馬德鐘　

梁：梁烈維

拍攝時眾人以全武裝上陣，仍要應付動作場面，相當不容易。	鍾嘉欣被形容於劇中很喪，因投入情緒變得較靜。	唯一的女飛虎黃智雯，與一班男演員已相當熟落。

羅：羅仲謙　

梁烈維和羅仲謙愛搞gag，一唱一和，令拍攝時氣氛輕鬆。	馬德鐘直言搏到盡，跳樓親身上陣，相當專業。	梁烈維直言很多時候未有替身，動作場面頂硬上。

袁：袁偉豪

「籮柚」開花

梁：我覺得最型係羅仲謙，佢型在「籮柚」開花，因為有個傷口喺「籮柚」度佢都無話有啲咩痛楚，個樣係仍然保持咁型，我好佩服呢下嘢，厲害厲害。

袁：其實今次最面不改容就係維維同埋謙仔，幾惡劣嘅情況下個樣都係好似啱啱化完妝咁無瑕疵。

馬：仲係個頭髮一條都唔跌落嚟嘅。

羅：我知最型咩喇！最型我哋戴完頭盔！除番落嚟個頭（髮）都係好硬o架！

梁：係呀，我哋set頭髮嗰時落咗喪多gel！

馬：我都知我最型係咩喇，係好多時都可以着便裝上裝備。

羅：係呀！便服加full gear係好有型。

馬：你睇吓飛虎隊啲友，着條短波褲咋！真係破壞晒飛虎隊嗰個英雄嘅形象。

羅：呢啲咪就係真實囉！

梁：即係原來喺街市買緊餸收到總部落order，又或者斬緊豬肉嗰個：「係，收到！」真係一個唏噓嘅飛虎隊。

失誤傷痕纍纍

袁：拍戲時記得羅仲謙傷得比較嚴重！有玻璃碎片插中個「八月十五」，就可大可小。

羅：唔係嗰度呀！係臀大肌！

袁：其實我哋嗰朝早呢係拍通宵，之後放早餐再拍一場戲，始終都係工作時間比較長，大家個意識無咁集中，咁就有少少失誤，所以就爆親阿謙個「臀大肌」喇。

梁：當時我即刻諗住幫佢鎅開條褲，挖開個傷口，啜番粒玻璃出嚟。

羅：好好㗎佢哋，全部幫我攞番晒啲便服呀，送我上車。

梁：係呀，攞條底褲畀佢換，佢條底褲染晒血。

羅：係咩？我本身着紅色！

黃智雯起晒弶

羅：其實今次呢套劇入面都無乜女仔。

梁：黃智雯囉！最暴力，佢成日走過嚟打我哋，又成日同我哋講埋啲男仔嘢。

馬：因為冇辦法，佢係生活喺我哋啲男仔堆入面。另外鍾嘉欣就係喪嘅，神經病嗰種，佢要投入嗰個發癲嘅情緒入面，所以會比較靜。

羅：但係智雯唔同，佢本身係圍住我哋嗰堆人入面。

馬：所以形成到一有其他女仔嘅時候佢就黑面喇！

梁：好似啲獅群，你有冇睇啲咩動物頻道？嗰啲獅群呢，嗰隻獅子乸見到其他獅子乸進入個獅群就即刻會「起晒弶」，即係佢要保護住佢嗰啲獅子公，咁所以一有君馨呀，同場嗰啲訓練班呢，阿智雯就會…

羅：靜咗好多。

梁：係喇，喺度望住囉！望住你班友仔喺度做乜。咁我哋見到都知情識趣，都會即刻返過去撩番佢同佢講：「傻豬嚟嘅，嗰啲野花，邊及家花香呢？」

冇威吔險反車

羅：武戲方面我哋通常都會排多幾次，因為爆破嗰啲都係一鑊過，希望可以做好啲，所以要排好晒位。

梁：好似阿袁偉豪有一場戲，要「揸」住個車頂掟彎入嚟，架車爭啲反但係最後無事，其實係度好晒啲位。

袁：我喺上面都差啲以為架車會反，因為嗰架車個避震好「軟」，同埋架裝甲車車身好高，佢一掟彎入嚟其實架車係側咗，咁我係爬咗喺個車頂嗰架上面，係感覺到架車個重心側咗一邊，當時冇替身又冇吊威吔。

馬：係囉，今集都無乜用到替身，就算跳樓我哋都係自己跳。

梁：做到就盡量自己做啦，因為今集真係見樣見得多。

袁：同埋有啲後尾補嗰啲配音，我哋拍嗰時有時笠住個頭套，補對白嗰時自己都要笠住個頭嚟錄。

後記：

用「型」來形容這飛虎四將已經不在話下，各人都散發個人魅力，於辛苦拍攝時仍能談笑風生，馬德鐘不時無心插柳幽自己一默，增添幾分親和，而袁偉豪談到工作相當認真、堅定又有自信，梁烈維和羅仲謙二人緊接附和，製造一大堆笑料，四人因拍攝劇集患難中培養默契與堅毅，真正展現出飛虎的大無畏精神！

羅仲謙

Make up：Ceci@Annie G Chan

Hair：Jan Chiu@IL Colpo

Wardrobe：Koyo Jeans

梁烈維

Make up：Circle Cheung(ndnco.co)

Hair：Kei Fung@HH hair.nail

Wardrobe：IZZUE COLLECTION @ I.T

場地：The Metrolex Kowloon Bay

文：影視組　

攝：吳文聰