陳慧琳生蛇 古仔急彈開
陳慧琳（Kelly）近日飽受「生蛇」困擾，身為拍檔的古天樂竟然未有「憐香惜玉」，聞訊後指驚傳染搞笑「彈開」，Kelly坦言病情最嚴重時，經常有「觸電」感覺，醫生更警告隨時會留疤，難得Kelly大智若愚，談病情仍笑嘻嘻。
繼3年前合拍賀歲片《八星抱喜》後，古仔與Kelly近日獲富豪酒店之邀合拍微電影，二人「升呢」由戀人變小夫妻。Kelly談劇情笑謂：「都有啲親熱場面，好似就嚟錫又錫唔到咁囉。」古仔在旁即答：「叫導演遲啲叫cut囉。」
痛到似觸電
Kelly昨被發現右手臂遍布紅印，起初以為她刮損受傷，她解釋謂：「生蛇呀，醫生話同水痘問題有關，細個時出過留咗啲菌喺身體，依家發出嚟，不過我就嚟好番嘞，最嚴重嗰時我成日覺得好似觸電咁，沖涼啲水彈埋嚟好痛。（驚傳染兩個囝囝？）大仔一早打晒預防針，細仔仲欠一支，應該冇事。（留疤？）醫生驚會呀，好彩傷口好細啫。」古仔聞訊後搞笑作勢彈開，隨後又「醫生上身」與Kelly討論病情：「我未出過水痘，因為成日走埠關係，我有個藥箱裝有各類藥物傍身就真。」
談到二人再合作，Kelly笑謂：「上次同古仔拍戲就生仔，今次生蛇：」古仔答：「你夠嘞，就嚟開酒樓嘞，咁鍾意賣點心（指蝦餃仔及小龍包）。」Kelly續說：「咁又係，一盅兩件夠晒數。」
文：影視組