馬德鐘回「娘家」happy

藝人馬德鐘、徐子珊、江美儀、李思捷和黃光亮等前晚為無綫新劇《以和為貴》擺煞科宴，夾錢請齊台前幕後食飯，但馬德鐘到場前卻大懵遺失提款卡，無奈碌卡埋單收回現金，幸好子珊預備充足。馬德鐘透露準備回歸娘家，並正與無綫洽談新合約：「錢緊要！（劇種有冇要求？）都唔緊要，好似今次《以和為貴》個角色都好好，期待套劇出街。」馬德鐘雖傳與高層樂易玲不和而離開無綫，但轉攻內地巿場的他始終寄望返無綫拍劇：「返到嚟個個都識，好有親切感，好開心。」樂易玲昨日受訪時坦言正與馬德鐘接觸，感覺良好。另外，美儀大讚拍檔思捷好sweet：「終於明白點解佢有咁多女朋友，佢成日都氹到我好開心，（佢好多女朋友咩？）女性朋友啫！」