農夫轉型「全職」湊歌迷
今時今日一個全能藝人，不單止要做到聲色藝全，農夫笑言更要轉型學搞歌迷聚會，特地與歌迷到迪士尼「約會」。C君欣賞完花車巡遊後，更高呼要到迪士尼拍MV。
組合農夫日前舉行歌迷聚會齊齊玩轉迪士尼，向來親民的兩人甫到埗就與粉絲相當熟落，較為膽小的C君雖然超怕過山車的離心力，不過為了不讓粉絲掃興，C君都堅決頂硬上！
玩完過山車後，農夫就率領歌迷到城堡前玩Light paint，分成兩小隊的歌迷分別畫出「C」和「6WING」向偶像表達愛意。難得到迪士尼玩，當然不少得重頭戲花車巡遊，陸永更急不及待拿出手機拍片，笑言要給愛女欣賞。
多元化聚會
分道揚鑣一年的農夫笑言近年「全職」搞歌迷聚會，與歌迷相聚多過出席商演活動。除了「迪士尼一天遊」這類戶外活動，原來農夫還會跟歌迷定期聚會：「我哋啲歌迷聚會好多元化o架，廚藝大賽、BBQ、踩單車，識咗咁多年大家好似朋友咁，同朋友玩去邊都開心。」兩人又爆料話：「有個四五十歲嘅歌迷，一嚟到就同我哋講佢咁耐都未去過主題樂園，好開心陪到歌迷做佢哋未做過嘅嘢。」
談到迪士尼最近新設了一個夜間花車巡遊，育有兩個女兒的陸永即大呻可惜：「上次同同事嚟睇，嚟到先知個個都帶埋屋企人嚟，得我冇帶到囡囡嚟！之後我拍咗啲片返屋企畀囡囡睇，佢一見到勁開心，一定會安排同佢再嚟多次！」
合體再出碟
講到農夫來年會合體再出碟，兩人即表示：「下年一定出，仲要打孖嚟分上下集出。之前我哋成日都忙拍劇，其實都寫唔到歌，希望下年專注喺音樂。」問到會否在迪士尼找靈感？C君笑言：「唔使喇，都寫得七七八八，反而喺度拍MV有得諗！」
文：音樂組
攝：張福宏