薛凱琪聽教 如廁杯不離手
薛凱琪（Fiona）前晚一身型Look出席活動，對於有星二代於台灣遭落藥迷姦，Fiona透露母親早已提醒她出外飲嘢切忌離開視線範圍，聽話的她為免「中招」永遠杯不離手，連如廁都揸到實。
Fiona、謝安琪（Kay）、羅力威、藍奕邦及AGA前晚出席「叱咤樂壇流行榜頒獎典禮」記者會，早前不滿被安排坐側邊而發老脾的羅力威獲安排坐中間位。戴上高帽的Fiona表示有留意星二代於台灣遭迷姦報道，曾於當地長住十個月的她說：「每次出去飲嘢都係好熟嘅朋友。」並透露其母每日叮囑她要提高警覺：「有叫我行開過，返轉頭唔好再飲杯嘢，所以會全程攞住杯嘢，連去廁所都會拎住。」
謝安琪想攞現金獎
穿上短裙的Kay對於被指有機會奪女歌手獎，她說：「年年都係咁傳，我絕對支持每個媒體，對獎項抱平常心。」近年頻頻到內地搵銀的Kay被問到是否想要「現金獎」？她笑說：「係都唔拘，冇乜所謂。」至於有內地網民發起杯葛她，Kay說：「我好溫和，唔會煽動人去做破壞行為，但係睇報道時要小心、全面同要負責任。」隨即暗示遭人憎恨：「人哋憎唔憎我係好小事。」
而備受「重視」的羅力威強調不想再多提早前發脾氣事件，記者笑指擔心他又不滿座位發癲，羅力威說：「幾年先一次，唔係成日發生，一向都自由自在，以後唔講太多嘢。」
文：音樂組