仙樂都難堪 被強啜10秒
性感女星仙樂都拍戲床戰肌肉亞生黃集鋒，首次拍咀戲的黃集鋒表現極度投入，施展「吸盤嘴」啜極唔放，嚇得仙樂都急急推開他！事後仙樂都直言以後對咀嘴有陰影，黃集鋒則解釋因太入戲聽不到導演嗌cut，已向仙樂都斟酒道歉。
「仙樂都」吳堯堯（YoYo）最近與亞洲先生黃集鋒、林睿及亞姐孫田俐姿合作中港合拍的微電影《滅火英雄》，飾消防署職員的YoYo暗戀消防員黃集鋒，兩人更要在床上翻滾激咀，YoYo晒事業線又裸背，黃集鋒則大騷六舊腹肌，場面火辣！
據知該場戲是導演臨時加，兩人都相當緊張，未拍過咀戲的黃集鋒上陣前竟亂問YoYo：「係咪真係唔可以伸脷？」嚇得YoYo大叫，現場所有劇組人員都得知此事。正式拍攝時，導演要求黃集鋒主動咀YoYo約兩秒時間，其後轉位再咀，但黃集鋒異常投入更「八爪魚上身」，施展「吸盤嘴」啜爆YoYo近十秒，被壓着的YoYo心感不妥用力推開對方，導演亦訓示黃集鋒「唔使咀咁耐」。另一場開心大團圓戲，黃集鋒則自行加戲，沒有溝通下突然抱起YoYo並將她拋起，令YoYo相當無奈。
反被索利是
昨日YoYo接受電話訪問，她直言該床戲拍得「不算愉快」，至今仍耿耿於懷，問是否覺得被對方「鹹豬嘴」？她說：「唔識答，係有啲難堪，有被強吻感覺，短期內對kiss都有陰影！（佢咀極唔放？）有少少，導演都有話佢，佢（黃集鋒）仲話獻咗螢幕初吻畀我，叫我封利是畀佢！講到我好似老手咁，其實我都冇咩經驗！」
黃集鋒則解釋首次拍咀戲未懂得拿捏，太投入而聽不到導演嗌cut，是誤會一場，事後得知YoYo不開心，已向她道歉：「我拍開打戲，咀戲一窺不通，好在YoYo有指點我，當時我可能處理得唔好，希望下次會好啲。（怕畀人話鹹豬嘴？）朋友都知我為人，點會專登做衰自己？我仲想繼續有工開。」
文：影視組