金秀賢表弟撻着港o靚模

由於Zion是韓國男神金秀賢的表弟，人氣即時急升，令不少香港fans關注，據知今年8月Zion來港出任跳舞比賽評判時，邂逅同場的岑日珈，兩人觸電互相「抄牌」，之後Zion雖人在韓國，但卻無阻兩人發展，在網上暗交多月。直至上周N-Sonic再次來港出席活動，Zion和Angie這對「網上情人」捉緊見面機會，當晚兩人拍拖到尖沙咀的酒吧消遣，玩到凌晨時分離開，戴上冷帽的Zion似乎飲到high high哋，兩人警戒性明顯減低，手拖手行着，更意猶未盡站在夜店門外商量下場。

見記者即閃

期間Zion出動「冧招」，拿出手機給「女友」Angie操刀自拍，當Angie舉起手機時，Zion即挨到Angie身後，表現親暱「頭貼頭」影相，Zion再加多個「V」字手勢令這張「自拍照」sweet到爆！之後，Zion似發現有記者在場，兩人表現驚青，密密斟一輪，Zion即跳上的士鬆人，Angie則表現得依依不捨，揮手目送Zion上車，然後再乘另一輛的士離開。

兩人幾杯落肚後，警戒性明顯減低。	N-Sonic於今年8月來港出席活動，Zion（左三）因而認識了岑日珈。	岑日珈對的士上的Zion表現得依依不捨。

口震震否認

昨日致電Angie求證拍拖一事，她口震震說：「唔係，唔係，係朋友啫。（拖晒手喎？）邊有呀，我哋朋友嚟啫。」Angie解釋當日剛好是Zion來香港工作，Zion相約她見面。當街頭貼頭影相？Angie承認說：「飲完嘢咪去附近行吓，見到啲得意嘢影吓啫。（Zion追你？）唔知，邊有咁快呀，我哋第一次約會啫。」Angie稱自己剛出道都以工作為先，公司亦不希望她拍拖分心。問到Zion是否符合其擇偶條件？Angie大讚Zion得意又可愛，不過仍需要互相了解，暫時只是朋友。問她可會飛到韓國一解相思之苦？Angie笑言：「唔會啦，要開工，不過佢返咗韓國都有短訊互相聯絡嘅。」

文：音樂組　

攝：追蹤組