否認耍大牌 安妮希芙威Hot夠變怪獸

兩大金像級人馬安妮希芙威（Anne Hathaway）與馬修麥康納希（Matthew McConaughey）聯同導演基斯杜化洛倫（Christopher Nolan）前日出席完在上海舉行的《星際啟示錄》（Interstellar）記者會後接受傳媒訪問。

換上中性打扮示人的安妮被問到最不願演甚麼角色時坦言：「我唔會演呆頭呆腦、只係望落好Hot嘅『花瓶』角色，由頭到尾只着一件爛鬼Tee，咩都唔做！反而我想鎅爛塊面扮令人望見都想嘔嘅怪獸。」

雖然安妮近年常被插「耍大牌」，但她自認似《星》片中主演的角色：「我哋同樣由傲慢變得謙虛，隨閱歷增長變得成熟，雖然我知最唔謙虛嘅事就係自認謙虛，哈哈！」

為兒子身教

至於今屆奧斯卡影帝馬修，一出場又再晒普通話講：「你好。」跟傳媒打招呼，相當熱情。問到馬修今年憑《續命梟雄》（Dallas Buyers Club）封帝後，有新作推出時會否感壓力，他表示：「贏咗之後，有新戲上映都一樣感覺，壓力同以前一樣。我唔清楚為角色減磅增磅係咪潮流，但我只想做好我份工。」

至於他選擇參演《星》片原來因為6歲大寶貝仔Levi：「早在我拍《星》前，佢已經問我好多有關太陽系及太空旅行嘅事，我作為父親想親身為佢示範，令他明白人類嘅潛力係無限。」

談到戲中一幕令人動容的喊戲，馬修透露：「我一早已同導演要求唔要任何綵排，最後終於一Take搞掂，而且全部係真眼淚。」馬修的人氣最近更殺到去日本，獲日本紀念日委員會食正他名字的日文讀音，將11月22日命為「馬修麥康納日」。

拒盲目拍3D

另外，導演基斯杜化則揚言拍戲拒跟潮流，不會盲目拍3D電影：「我覺得3D反而令螢幕縮少，但《星》片關於宇宙、天體，2D就更能令觀眾感受當中嘅壯闊，3D反而唔係一個好選擇。」

他表示不會為迎合中國市場而強加中國元素：「可能《變形金剛：殲滅世紀》（Transformers:Age of Extinction）嘅故事框架較大，導演米高比爾（Michael Bay）可自然地加入中國元素，但《星》片故事僅圍繞一小撮人，較為本土，所以唔太適合。」